नेपाल राष्ट्र बैंकले आगामी वर्ष २०८३ सालमा हुने बैंक बिदाको सूची सार्वजनिक गरेको छ । जसअनुसार वर्ष २०८३ मा २९ दिन बैंक बिदा हुनेछन् ।
वैशाख १ गते नयाँ वर्ष २०८३ सुरु हुने भएकाले त्यो दिन बैंक बिदा हुनेछ । राष्ट्र बैंकका अनुसार वैशाख १८ गते (मे १) विश्व मजदुर दिवस, जेठ १५ गते गणतन्त्र दिवस, भदौ १३ गते गाईजात्रा र भदौ १९ गते श्रीकृष्ण जन्माष्टमीका दिन बैंक बिदा छ ।
भदौ २९ गते हरितालिका तीज, असोज ३ गते संविधान दिवस, असोज ९ गते इन्द्रजात्रा (काठमाडौं उपत्यका) मा बैंक बिदा हुनेछ भने असोज १८ गते जितिया पर्वका दिनमा भने बैंकहरूले आवश्यकता अनुसार पूर्ण बिदा दिन वा आंशिक सेवा सञ्चालन गर्न सक्नेछन् ।
यस्तै, असोज २५ गते घटस्थापनाका दिन बैंक बिदा छ । असोज ३१ गते फूलपातीदेखि कार्तिक ६ गते द्वादशीसम्म बैंक बिदा रहनेछ ।
तिहारमा भने कार्तिक २२ गते लक्ष्मीपूजादेखि कात्तिक २६ गते भाइटिकाका दिनसम्म बैंक बिदा रहनेछ ।
यसपछि छठ पर्वमा पनि बैंक बिदा छ । अरु धार्मिक तथा जातीय पर्वमा आंशिक सेवा दिन सक्नेछन् । सरकारले तोक्ने सार्वजनिक बिदामा भने आवश्यकताअनुसार निर्णय हुनेछ ।
