गत फागुन २१ गते सम्पन्न प्रतिनिधिसभा सदस्य निर्वाचन, २०८२ को निर्वाचन परिणामसहितको समग्र प्रतिवेदन राष्ट्रपति रामचन्द्र पौडेलसमक्ष बुझाईएको छ। निर्वाचन आयोगका कार्यवाहक प्रमुख निर्वाचन आयुक्त राम प्रसाद भण्डारीले आज राष्ट्रपति पौडेललाई प्रतिवेदन बुझाएका हुन् ।
आयोगले निर्वाचन परिणामसहितको समग्र प्रतिवेदन बुझाएसंगै अब नेपालको संविधान, २०७२ को धारा ७६ (१) अनुसारको सरकार गठनका लागि आह्वान गर्ने बाटो खुलेको छ । अब नव नियुक्त सांसदहरुको सपथपछि नयाँ सरकार गठन हुने छ । सांसदहरुको सपथ चैत्र १२ गते तयारी छ ।
राष्ट्रिय स्वतन्त्र पार्टी (रास्वपा)ले नयाँ सरकार गठनका लागि एकल रूपमा स्पष्ट बहुमत प्राप्त गरेको छ । दुई सय ७५ सदस्यीय प्रतिनिधिसभामा रास्वपाका कुल १८२ सांसद निर्वाचित भएका छन् ।
रास्वपाले आफ्नो वरिष्ठ नेता बालेन शाहलाई प्रधानमन्त्री बनाउनको लागि आफ्नो विधान संशोधन गर्दै छ। रास्वपाले विधान संशोधन गरेर बालेनलाई संसदीय दलको नेता चयन गर्न लागेको हो । त्यसपछि राष्ट्रपतिले नेपालको संविधान, २०७२ को धारा ७६ (१) को व्यवस्था अनुसार बहुमत प्राप्त दलको संसदीय दलको नेताको रुपमा बालेन्द्र शाहलाई प्रधानमन्त्री नियुक्त गर्ने छन् ।
