त्रिभुवन विश्वविद्यालय शिक्षण अस्पताल (टिचिङ हस्पिटल)ले स्वास्थ्य बीमा सेवा बन्द गर्ने निर्णय गरेको छ । अस्पताल प्रशासनका अनुसार माघ १ गतेदेखि स्वास्थ्य बीमा अन्तर्गतका सम्पूर्ण उपचार सेवा बन्द गर्ने निर्णय भएको हो ।
स्वास्थ्य बीमा बोर्डले अस्पताललाई ४० करोड दाबी भूक्तानी नदिएपछि आर्थिक रुपमा समस्या सिर्जना भएको भन्दै अस्पतालल स्वास्थ्य बीमा सेवा बन्द गर्ने निर्णय गरेको हो । अस्पतालका अनुसार स्वास्थ्य बीमा अन्तर्गतका सेवा दिँदा अस्पतालले मासिक ५ करोड रुपैयाँभन्दा बढी खर्च व्यहोर्दै आएपनि स्वास्थ्य बीमा बोर्डले त्यसको ५० प्रतिशत मात्र दाबी स्वीकृत गरिदिँदा समस्या उत्पन्न भएको हो ।
‘बोर्डबाट भूक्तानी नआउँदा अस्पतालले आफ्नै आन्तरिक स्रोतबाट २ वर्षदेखि सेवा दिँदै आएको थियो । अब यसलाई निरन्तरता दिन सकिने अवस्था भएन । बोर्डबाट भूक्तानी नआएकै कारण औषधि तथा स्वास्थ्य सामग्री सप्लायरलाई पनि ५ महिनादेखि अस्पतालले भूक्तानी दिन सकेको छैन’ सूचना अधिकारी डा. गोपाल सेढाईंले भने, ‘यस्तो अवस्था आएपछि सेवा बन्द गर्ने निर्णयमा पुग्यौँ ।’
उता, स्वास्थ्य बीमा बोर्डले टिचिङसहित स्वास्थ्य बीमा अन्तर्गतका सेवाका लागि सूचीकृत स्वास्थ्य संस्थालाई ११ अर्बभन्दा बढी भुक्तानी दिन बाँकी छ ।
