आइजीआई प्रुडेन्सियल इन्स्योेरेन्सको २८औँ वार्षिक साधारणसभा सम्पन्न भएको छ । साधारणसभाले चुक्ता पूंजीको ५ प्रतिशत नगद लाभांश दिने सम्बन्धि प्रस्ताव पारित गरेको छ ।
त्यसैगरी कम्पनीको केन्द्रीय कार्यालय पनि सर्ने भएको छ । यसअघि नक्सालमा रहँदै आएको कार्यालय अब पानीपोखरीस्थित आफ्नै भवनमा सर्ने भएको हो । कम्पनीले पानीपोखरीस्थित २ रोपनी ६ आना २ पैसा ३ दाम जग्गामा करिब ६० हजार वर्गफिटमा २ तल्ला पार्किङ्ग सहित ११ तल्लाको भवन बनाएको छ ।
ठेकेदार कम्पनीबाट कम्पनीलाई भवन हस्तान्तरण भइसकेको र माघ महिना भित्रमा कम्पनीको प्रधान कार्यालय पानीपोखरीस्थित आफ्नै भवनमा सर्ने बताइएको छ । कम्पनीलाई आवश्यक पर्ने ४ तल्लासम्म प्रयोग गरी अन्य तल्लाहरु भाडामा लगाई आम्दानी गरिने कम्पनीले जनाएको छ ।
सभामा कम्पनीका प्रमुख कार्यकारी अधिकृत युगेशभक्त बादे श्रेष्ठले कम्पनीले देशका सात वटै प्रदेशमा रहेका ९० वटा शाखाबाट देशैभरी बलियो उपस्थिति जनाइरहेको बताए । उनका अनुसार ५३१ जना कर्मचारीहरु, ४३० अभिकर्ताहरु र १९२ सर्भेयरहरुमार्फत कम्पनीले सेवा प्रदान गर्दै आएको छ ।
चुक्ता पूंजी ३ अर्ब २ करोडसहित निर्जीवन बीमा कम्पनीहरुमा आइजीआई प्रुडेन्सियल इन्स्योेरेन्स सबभन्दा ठूलो बीमा कम्पनीको रुपमा कम्पनी रहेको छ । गत आर्थिक वर्षमा कम्पनीले ३ अर्ब ६३ करोड ६१ लाख बीमा प्रिमीयम संकलन गरेकोमा समिक्षा वर्षमा ६.३२ प्रतिशतले वृद्धि भई ३ अर्ब ८६ करोड ५९ लाख संकलन गनै सफल भएको कम्पनीले जनाएको छ ।
साधारणसभाकै अवसर पारेर कम्पनीले IGI Health Care नयां बीमा योजना सेवा सुरु गरेको छ । यस योजनाले व्यक्ति तथा परिवारको स्वास्थ्य बीमामा सहज सेवा प्रदान हुने लक्ष्य कम्पनीको रहेको छ ।
त्यसैगरी कम्पनीले पहिलो पटक नेपालमा विश्वभरबाट ट्रेकिङ र पर्वतारोहणको लागि आउने विदेशी नागरिकहरुको लागि Himalayan Guardian Nepal संगको सहकार्यमा IGI Tourist Insurance policy को शुरुवात गरेको छ । जसबाट नेपालका विभिन्न ठाउंमा ट्रेकिङ र विभिन्न हिमश्रृखलाहरुको पर्वतारोहणको लागि आउने विदेशीहरुले दुघटना तथा उचाइजन्य रोग (Altitude Sickness) भएमा नगदरहित Rescue र औषधोपचार प्राप्त गर्न सक्ने गरी नयाँ बीमालेखको सुरुवात गरिएको कम्पनीले जनाएको छ ।
सभामा शेयरधनीलाई स्वागत गर्दै अध्यक्ष हेमराज ढकालले बीमाले आर्थिक संकटविरुद्द सुरक्षा कवचको रुपमा काम गर्दै आएको बताएका छन् । व्यक्तिको जीवन, सम्पत्ति, व्यवसाय तथा दायित्वको संरक्षण गर्दै प्राकृतिक तथा मानव सिर्जित विभिन्न जोखिमबाट उत्पन्न हुन सक्ने आर्थिक संकटविरुद्ध बीमाले सुरक्षा कवचको रुपमा महत्वपूर्ण भूमिका निर्वाह गर्दै आएको उनको भनाइ छ ।
कुनै पनि राष्ट्रको अर्थतन्त्रको समग्र अवस्था, व्यवसायको विस्तार र दिगोपनाको मूल्यांकन गर्दा बीमा बजारको विकास, पहुंच र विश्वसनीयतालाई एक प्रमुख सूचकको रुपमा लिने गरिएको भन्दै ढकालले बीमा बजारको स्थायित्व कायम राख्ने र विश्वसनीयता अभिवृद्धि गर्ने उद्देश्यका साथ कम्पनीले आफ्नो स्थापनाको २८औं बर्ष सफलतापूर्वक पूरा गरिसकेको बताए ।
बीमा बजारलाई स्वच्छ, पारदर्शी र भरपर्दो बनाउंदै बीमितको हकहितको संरक्षण गर्दै आफ्नो दायित्वप्रति कम्पनी सदैव प्रतिवद्ध रहंदै आएको पनि उनको भनाइ छ ।
