सरकारले दशैँ, तिहार र छठ पर्वलाई लक्षित गरी भदौ ३० गतेदेखि सुपथ मूल्य पसल सञ्चालन गर्ने भएको छ । उद्योग वाणिज्य तथा आपूर्ति मन्त्रालयमा भएको छलफल पश्चात खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पोरेसन लिमिटेडले देशैभर सुपथ मूल्य पसल सञ्चालन गर्ने निर्णय भएको हो ।
निर्णय अनुसार खाद्य व्यवस्था तथा व्यापार कम्पनीले देशभर १११ स्थानमा सुपथ मूल्य पसल सञ्चालन गर्नेछ भने साल्ट ट्रेडिङले ३८ स्थानमा सुपथ मूल्य पसल सञ्चालन गर्नेछ । सुपल मूल्य पसलमा खाद्यान्नमा प्रतिकिलो १० रुपैयाँसम्म छुट हुनेछ ।
कुन वस्तुमा कति छुट ?
खाद्य व्यवस्था तथा व्यापार कम्पनीका प्रमुख कार्यकारी अधिकृत रमेश आचार्यका अनुसार सुपथ मूल्य पसलमा सबै किसिमका चामल, गहुँका दाना र चिनीमा प्रतिकिलो ५ रुपैयाँ छुट हुनेछ । यस्तै, सबै खालका दाल, गेडागुडी (चना, भटमास र केराउसमेत)मा पनि प्रतिकिलो ५ रुपैयाँ छुट हुनेछ ।
यसैगरी, तोरी, सनफ्लावर र भटमासको तेलमा प्रतिलिटर ७ रुपैयाँ छुट उपलब्ध हुनेछ । चिउरा, आटा, पिठो र मैदामा प्रतिकिलो ७ रुपैयाँका दरले नै छुट पाइनेछ ।
यस्तै, जिरा, धनिया र चियापत्तीमा प्रतिकिलो १० रुपैयाँ छुट पाइनेछ । कर्णालीको सीमी तथा फापर (दाना), चिनो, कागुनो र मार्सी तथा बासमती चामलमा पनि उपभोक्तालाई प्रतिकिलो १० रुपैयाँ छुट दिने निर्णय भएको छ ।
जिाउँदो खसी, बोका र च्याङ्ग्रा पनि प्रतिकिलो १० रुपैयाँ छुटमा बिक्री गरिने भएको छ । सबै वस्तुहरुको निःशुल्क होम डेलिभरी सेवा पनि उपलब्ध गराइनेछ ।
यसैगरी, साल्ट ट्रेडिङबाट सञ्चालन हुने सुपथ मूल्य पसलबाट नुनमा प्रतिकिलो २ रुपैयाँ, चिनी प्रतिकिलो ५ रुपैयाँ, तेल, चिउरा, पिठो, मैदा र दाल प्रतिकिलो ७ रुपैयाँ छुटमा उपभोक्तालाई उपलब्ध गराउने निर्णय भएको छ ।
१५ सय वटा खसी बोक र च्याङ्ग्रा काठमाडौँ ल्याइने
खाद्यका सीईओ आचार्यका अनुसार दशैँ र तिहारका लागि १ हजार ५ सय वटा खसी बोका र च्याङ्ग्रा खरिद गर्न लागिएको छ । प्रतिकिलो १० रुपैयाँ छुटमा उपभोक्तालाई उपलब्ध गराउन र बजारमा मूल्यवृद्धि नियन्त्रण गर्न हरेक वर्ष जस्तै यसपाली पनि १५ सय वटा खसी, बोका र च्याङ्ग्रा ल्याउन लागिएको उनको भनाइ छ ।
‘१२ सय वटा खसी र बोका ल्याउन लागिएको छ, ३ सय वटा च्याङ्ग्रा ल्याउन लागिएको छ । च्याङ्ग्रा मुस्ताङबाट खरिद गर्दैछौँ’ उनले भने ।
कहाँ कहाँ राखिँदैछ सुपथ मूल्य पसल ? मन्त्रालयको निर्णय हेर्नुहोस्
