खारेजीमा जान लागेको क्रिष्टल फाइनान्स लिमिटेडले पैसा लिन बाँकि रहेका निक्षेपकर्तालाई दाबी पेश गर्न आग्रह गरेको छ। क्रिष्टल फाइनान्सको लिक्विडेटरको कार्यालयले आज एक सूचना जारी गर्दै साविक क्रिष्टल फाइनान्समा निक्षेप खाता रहेका व्यक्ति/संघ/संस्थाहरुलाई १५ दिन भित्र आफनो लिन बाँकी निक्षेप भुक्तानी लिन दावी पेश गर्न अनुरोध गरेको हो।
दाबी पेश गर्दा निक्षेप रकम, निक्षेपकर्ताको दस्तखत ( खाता खोल्दा वखतको), नागरिकताको प्रमाण पत्रको प्रतिलिपी, कम्पनी / संघ / संस्थाहरुको हकमा दर्ता तथा प्यान प्रमाण पत्रको प्रतिलिपी , नेपाल राष्ट्र बैंकको ग्राहक पहिचान कार्यविधी बमोजिमको अन्य आवश्यक कागजातहरु र फोटोहरु पनि बुझाउनु पर्ने कार्यालयले जनाएको छ।
पुनरावेदन अदालत, पाटनको २०७२।७।२० को फैसला र उच्च अदालत, पाटनको २०७७।९।१२ को आदेशानुसार दामासाही सम्बन्धी ऐन, २०६३ को दफा ३७ (१) बमोजिम लिक्विडेटर नियुक्ति भई क्रिष्टल फाइनान्स लिमिटेड खारेजीको प्रक्रियामा रहेको छ । दामासाही सम्बन्धी ऐन, २०६३ को दफा २२ को उपदफा (१) को खण्ड (ख) बमोजिम सो कम्पनीलाई ऋण प्रदान गर्ने सम्पूर्ण साहुहरुलाइ आफनो ऋण दाबी पेश गर्न यस अघिनै कार्यालयले सूचना जारी गरिसकेको छ।
