नबिल बैंकले गत आर्थिक वर्ष २०८१/८२ को चौथो त्रैमासको वित्तीय विवरण प्रकाशन गरेको छ। प्रकाशित विवरण अनुसार आर्थिक वर्ष २०८१/८२ मा कम्पनीले ७ अर्ब १२ करोड ७५ लाख रुपैयाँ खुद नाफा कमाएको छ।
अघिल्लो आर्थिक वर्षको सोहि अवधिको तुलनामा कम्पनीको खुद नाफा १५.०१ प्रतिशतले बढेको हो । अघिल्लो आर्थिक वर्षको यसै अवधिमा कम्पनीको खुद नाफा ६ अर्ब १९ करोड रुपैयाँ थियो।
समीक्षा अवधिमा कम्पनीको खुद ब्याज आम्दानी सामान्य बढेर १६ अर्ब ३१ करोडबाट १६ अर्ब ३२ करोड पुगेको छ। कम्पनीले सम्भावित जोखिमको लागि इम्पेयरमेन्ट चार्ज अन्तर्गतको रकम ४ अर्ब ६३ करोडबाट घटेर २ अर्ब ३९ करोडमा सिमित भएको छ । इम्पेयरमेन्ट चार्ज घटेको कारण खुद ब्याज आम्दानी झिनो अंकले बढ्दा पनि बैंकको नाफा बढेको देखिन्छ। कम्पनीको संचालन नाफा भने २५.४४ प्रतिशतले बढेर १० अर्ब ८४ करोड पुगेको छ ।
यस अवधिमा कम्पनीको वितरणयोय मुनाफा ५४.८२ प्रतिशतले बढेर ४ अर्ब ७७ करोड ३० लाख पुगेको छ । कम्पनीको वितरणयोग्य प्रति शेयर आम्दानी १७.६४ रुपैयाँ रहेको छ, यसले कम्पनीको लाभांश क्षमता १७.६४ प्रतिशत रहेको देखाउछ । यद्यपि बैंकले दिने लाभांश भने विभिन्न नियमकीय व्यवस्था र निर्दशनमा भर पर्छ। अघिल्लो आर्थिक वर्षमा कम्पनीको वितरणयोग्य मुनाफा ३ अर्ब ८ करोड थियो ।
कम्पनीको चुक्ता पुंजी २७ अर्ब ५ करोड रुपैयाँ रहेको छ भने रिजर्भमा २८ अर्ब ६७ करोड रहेको छ। कम्पनीले यस अवधिसम्ममा ५ खर्ब २४ अर्ब निक्षेप संकलन गरेको छ भने ४ खर्ब १२ अर्ब कर्जा लगानी गरेको छ।
समीक्षा अवधिमा कम्पनीको प्रति शेयर आम्दानी २६.३४ रुपैयाँ रहेको छ भने कम्पनीको प्रति शेयर नेटवर्थ २३५.५८ रुपैयाँ रहेको छ। कम्पनीको खराब कर्जा ४.२७ प्रतिशत रहेको छ।
