गत आर्थिक वर्षमा नेपालबाट एउटा जहाज र एउटा हेलिकप्टर निर्यात भएको छ । भन्सार विभागले सार्वजनिक गरेको वैदेशिक ब्यापारको तथ्यांक अनुसार नेपालबाट गत आर्थिक वर्ष २०८१/०८२ मा एउटा जहाज र एउटा हेलिकप्टर निर्यात भएको हो ।
भन्सार विभागका अनुसार १५ हजार किलो तौल भएको जहाज नेपालबाट साउथ अफ्रिकामा बिक्री भएको हो । यसको मूल्य ६९ करोड १४ लाख ४६ हजार रुपैयाँ छ ।
यस्तै, २ हजार किलो तौल भएको हेलिकप्टर भारतलाई बिक्री गरिएको छ । जसको मूल्य १७ करोड ३७ लाख ५८ हजार रुपैयाँ रहेको भन्सार विभागको तथ्यांकमा उल्लेख छ ।
कसले बेचेको थियो ?
नेपाल नागरिक उड्डयन प्राधिकरण (क्यान)का अनुसार नेपालबाट बिक्री भएका जहाज र हेलिकप्टर श्री एयरलाइन्सले बेचेको हो ।
सामान्यतया, यात्रु बोक्ने भन्दा पनि ढुवानीका लागि प्रयोग हुँदै आएका एमआई सिरिजका हेलिकप्टरको उपयोगीता कम हुन थालेपछि श्रीले एउटा हेलिकप्टर बिक्री गरेको क्यानले जानकारी दिएको हो । ‘हाइड्रोपावरका सामान बोक्न प्रयोग हुने खालको हेलिकप्टरको बिजनेश अहिले त्यति छैन, त्यहीँ भएर श्रीले आफूसँग भएको एमआई सिरिजको एउटा हेलिकप्टर बेचेको हो’ क्यान स्रोतले भन्यो ।
त्यसैगरी, नेपालबाट दक्षिण अफ्रिकामा बिक्री भएको जहाज पनि श्रीकै भएको क्यानले जनाएको छ ।
