काठमाडौँको ‘रिङ– रोड’ (चक्रपथ)मा सार्वजनिक यातायात सेवा दिँदै आएको महानगर यातायात प्रा.लि.ले आज बुधबारबाट विद्युतीय बस सञ्चालनमा ल्याएको छ । कम्पनीले आजबाट १२ वटा ठूला विद्युतीय बस सञ्चालनमा ल्याएको हो ।
प्रा.लि.बाट पब्लिक कम्पनीमा रुपान्तरण हुने र सर्वसाधारणलाई समेत आईपीओ निष्काशनको तयारीमा रहेको कम्पनीले १२ वटा विद्युतीय बस सञ्चालनमा ल्याएको हो । कम्पनीका अध्यक्ष शन्तोष खतिवडाको अध्यक्षतामा आज काठमाडौँमा आयोजित एक कार्यक्रममा भौतिक पूर्वाधार तथा यातायातमन्त्री देवेन्द्र दाहालले महानगर यातायातका विद्युतीय बस शुभारम्भ गरेका हुन् ।
चेरी वन्डाले बनाएका यी बसले एकपटकमा ६८ जनासम्म यात्रु बोक्ने छन् । १४४.९२ किलोवाट आवर क्षमताको ब्याट्री प्याकमा आएका यी गाडीहरु एक पटकको फूल चार्जमा ३९२ किलोमिटर कुद्ने जनाइएको छ । कम्पनीले कलंकीमा चार्जिङ स्टेशन पनि बनाइरहेको छ ।
यी बसको ग्राउण्ड क्लियरेन्स ३८५ एमएम छ ।
