बुधबार बिहानै बुद्ध एयरले आफ्नो आधिकारिक फेसबुक च्याट ग्रुपमा काठमाडौंस्थित आन्तरिक विमानस्थलमा टेलिफोन लाइन अवरुद्ध रहेको खबर आयो । बुद्धका प्रतिनिधिले सोही म्यासेजसँगै उडानसम्बन्धी जानकारीका लागि कल सेन्टर वा मोबाइल एपमार्फत् सूचना लिन सेवाग्राहीलाई अनुरोध गरे ।
सुरुमा बुद्धको मात्रै टेलिफोनमा समस्या आएको होला भनेर खासै चासो दिएको पाइएन । तर, केही बेरपछि त्रिभुवन अन्तर्राष्ट्रिय विमानस्थलको आन्तरिक टर्मिनलतर्फ सबै टेलिफोन सेवा अवरुद्द भएको समाचार फैलियो । यद्यपी, त्यतिबेलासम्म के कारणले सेवा अवरुद्द हुन पुग्यो भन्ने जानकारी कतैबाट थाहा भएको थिएन ।
एयरपोर्ट प्रशासनले टेलिकमका प्राविधिकलाई खबर गर्यो । प्राविधिकहरु आएर हेरेपछि बल्ल थाहा भयो की, टेलिफोनको फाइबर तार चोरी भएको रहेछ । जसका कारण मंगलबार साँझ ७ बजेदेखि नै आन्तरिकतर्फको ल्यान्डलाइन टेलिफोन सेवा अवरुद्ध हुन पुगेको रहेछ ।
त्रिभुवन अन्तर्राष्ट्रिय विमानस्थलका प्रवक्ता रिन्जी शेर्पाले एयरपोर्टको आन्तरिक उडान हुने क्षेत्रतर्फ जाने बाटोमा रहेको नेपाली सेना बसेको ठाउँ नजिकै टेलिकमको तार काटिएको फेला परेको जानकारी दिएका छन् । उनका अनुसार टेलिकमका प्राविधिकहरुले हेर्दा ७ देखि ८ मिटर तार काटेर लगिएको पाइएको छ ।
जसका कारण करिब १८ घण्टा आन्तरिक टर्मिनलमा टेलिफोन सेवा अवरुद्ध हुन पुग्यो । अहिले भने मर्मत भएर टेलिफोन सेवा सञ्चालनमा आइसकेको नेपाल टेलिकमले जनाएको छ । यसबारे अब अनुसन्धान अघि बढ्ने विमानस्थल प्रशासनले जनाएको छ । यसका लागि प्रहरीको समेत सहायता लिइने बताइएको छ ।
