बिवाइडीको विद्युतीय गाडी किनेका ग्राहकहरुले वारेन्टीमा लाभ प्राप्त गर्ने भएका छन् । नेपालका लागि बीवाइडीको आधिकारिक बिक्रेता साइमेक्स इंकले आफ्ना ईभीमा वारेन्टी अवधि बढाएसँगै पूराना ग्राहकसमेत लाभान्वित हुने भएका हुन् ।
कम्पनीले नेपालमा बिक्री भएका सबै बिवाइडी ईभीमा व्यापक विस्तारित वारेन्टी (कम्प्रिहेन्सिभ एक्सटेन्डेड वारेन्टी) लागू गर्ने घोषणा गरेको हो । यस अनुसार अब बिवाइडीका ब्याट्री, मोटर, होल भेहिकल र पार्टस् सबैको वारेन्टी अवधि बढाइएको छ ।
कम्पनीले ब्याट्रीको वारेन्टी थप २ वर्ष बढाएको छ । हाल ब्याट्रीमा ८ वर्ष वा १ लाख ६० हजार किलोमिटरको वारेन्टी रहँदै आएकोमा अब १० वर्ष वा २ लाख किलोमिटर वारेन्टी पाइनेछ ।
मोटरमा पनि हाल ८ वर्ष वा १ लाख ५० हजार किलोमिटर वारेन्टी रहेकोमा अब १० वर्ष वा २ लाख किलोमिटर पुर्याइएको छ ।
कम्पनीले लाइट, टायर प्रेसर मोनिटरिङ मोड्युल, सस्पेन्सन र बल ज्वाइन्ट लगायतका कम्पोनेन्टमा हाल कायम ४ वर्ष वा १ लाख किलोमिटरको वारेन्टीलाई बढाएर ५ वर्ष वा १ लाख २५ हजार किलोमिटर बनाएको छ ।
कन्जुमेबल तथा आयल, चार्जिङ इक्वीपमेन्ट, गिफ्ट र रेफ्रिजेरेटर लगायतका पाटर्स् बाहेक सबै भेहिकल पाट्र्समा ६ वर्ष वा १ लाख ५० हजार किलोमिटर वारेन्टीलाई बढाएर ७.५ वर्ष वा १ लाख ८७ हजार ५ सय किलोमिटरको कायम गरिएको साइमेक्सले जनाएको छ ।
साइमेक्स इंकका सीईओ साहिल श्रेष्ठले वारेन्टी एक्सटेन्डले ग्राहकहरूलाई उत्कृष्ट सेवा प्रदान गर्ने कम्पनीको प्रतिवद्धता झल्काएको बताएका छन् ।
‘हाम्रो यो एक्सटेन्डेड वारेन्टीले बीवाइडीको अत्याधुनिक विद्युतीय सवारी प्रविधिप्रति हाम्रो दृढ विश्वास र हाम्रा ग्राहकहरूलाई उत्कृष्ट सेवा प्रदान गर्ने प्रतिवद्धता झल्काउँछ,’ उनले भने, ‘विद्युतीय सवारीतर्फको रुपान्तरण तीव्र गतिमा अगाडि बढिरहेको समयमा यो पहलले हाम्रा ग्राहकहरूमाझ दीर्घकालीन विश्वास र निष्ठा निर्माण गर्न महत्वपूर्ण भूमिका खेल्ने हामीले विश्वास लिएका छौं ।’
बीवाइडीले हाल नेपालभर रहेका १३ भन्दा बढी अत्याधुनिक सर्भिस सेन्टर, ३० बढी चार्जिङ नेटवर्कमार्फत सेवा दिँदै आएको छ ।
