वाणिज्य, आपूर्ति तथा उपभोक्ता संरक्षण विभागको महानिर्देशकको जिम्मेवारी सहसचिव कुमार दाहालले पाएका छन् । उद्योग, वाणिज्य तथा आपूर्तिमन्त्री दामोदर भण्डारीले मन्त्रीस्तरी निर्णयमार्फत दाहाललाई वाणिज्य विभागको महानिर्देशकको जिम्मेवारी दिएका हुन् ।
विभागका महानिर्देशक रहेका राजन पौडेलको संघीय मामिला तथा सामान्य प्रशासन मन्त्रालयको अतिरिक्त समूहमा सरुवा भएपछि विभागमा महानिर्देशको पद रिक्त खाली थियो ।
अहिले महानिर्देशक बनाइएका दाहाल यसअघि ८ वर्ष अघि पनि वाणिज्य विभागकै महानिर्देशक थिए । २०७३ सालमा सहसचिव भएका उनको पहिलो पदस्थापन नै वाणिज्य विभागको महानिर्देशकमा भएको थियो ।
त्यतिबेला १ वर्ष महानिर्देशकको जिम्मेवारी सम्हालेर बिदा भएका उनले ११ महिना बिराटनगर महानगरपालिकाको प्रमुख प्रशासकीय अधिकृत, एक वर्ष यातायात व्यवस्था विभागमा महानिर्देशक र ६ महिना राष्ट्रिय सूचना आयोगमा काम गरे ।
१४ महिना वैदेशिक रोजगार विभागको महानिर्देशक पनि बने । लुम्बिनी प्रदेश सरकारको मुख्यमन्त्री तथा मन्त्रिपरिषद्को कार्यालयमा समेत काम गरेका उनले सोही प्रदेशको यातायात मन्त्रालयको सचिव भएर पनि ११ महिना काम गरे ।
१४ महिना स्थानीय विकास प्रशिक्षण प्रतिष्ठानको कार्यकारी निर्देशक, ७ महिना युवा तथा खेलकुद मन्त्रालय र ७ महिना भूमि मन्त्रालयमा कार्यरत रहेका दाहाल अन्ततः वाणिज्य विभागको महानिर्देशक बनेका छन् ।
