सौरभ ग्रुप अन्तर्गतको सर्वोत्तम सिमेन्टले सञ्चालनमा रहेका दुई सिमेन्ट उद्योगको सबै स्वामित्व खरिद गरेको छ । सर्वोत्तम सिमेन्टले शुभश्री जगदम्बा सिमेन्ट मिल्स लिमिटेड र जगदम्बा सिमेन्ट प्रा. लि.को सम्पूर्ण शेयर स्वामित्व खरिद गरेको हो ।
सर्वोत्तम सिमेन्टका अध्यक्ष विष्णु प्रसाद न्यौपानेले शुभश्री जगदम्बा सिमेन्ट मिल्स लिमिटेडको प्रति शेयर मूल्य रु १००।- र जगदम्बा सिमेन्ट प्रा. लि. को प्रति शेयर मूल्य १५/- का दरले खरिद गरिएको हो। उनका अनुसार सर्वोत्तम सिमेन्टको शतप्रतिशत शेयर स्वामित्व रहेको सर्वोत्तम सिमेन्टको सहायक कम्पनी सर्वोत्तम होल्डिङ्गले ति दुई कम्पनीको शेयर स्वामित्व खरिद गरेको हो । दुबै कम्पनीको स्वतन्त्र लेखा परिक्षकबाट DDA प्रतिवेदन तयार गरी प्रतिवेदन बमोजिम शेयर खरिद गरिएको अध्यक्ष न्यौपानेले बताए ।
अध्यक्ष न्यौपानेका अनुसार हाल सञ्चालनमा रहेका दुबै उद्योग खरिद गर्दा, करिब २२ बर्ष पुरानो ब्राण्डका साथै डिलर नेटर्वकको कम्पनीलाई साथ प्राप्त हुने छ। नयाँ उद्योग स्थापना गर्दा, हालको लगानीको ३ गुणा ठुलो पुँजीको आवश्यकताको साथै उद्योग स्थापना पश्चात उत्पादनको लागि आवश्यक बजार पर्वद्धन गर्न समय लाग्ने अवस्थामा उल्लेखित कम्पनीहरु खरिदको कार्य कम्पनीको हितमा रहेको उनले बताए।
शुभश्री जगदम्बामा सौरभ ग्रुपको ६० र शंकर ग्रुपको ४० प्रतिशत स्वामित्व थियो । अब सौरभ ग्रुपले ४० प्रतिशत स्वामित्व किनेर कम्पनीको पूर्ण स्वामित्व आफ्नो बनाएको हो । त्यस्तै जगदम्बा सिमेन्टमा शंकर ग्रुपको ४५ प्रतिशत र सौरभ ग्रुपको ५५ प्रतिशत स्वामित्व थियो । अब सौरभ ग्रुपले शंकर ग्रुपको नाममा रहेको ४५ प्रतिशत शेयर स्वामित्व खरिद गरेर कम्पनीको पूर्ण स्वामित्व लिएको हो । यस संगै दुवै कम्पनीबाट शंकर ग्रुप बाहिरिएको छ ।
