अर्थमन्त्री डा.स्वर्णिम वाग्लेले बजेटमा हेरफेर हुने करका दरबारे व्यवसायीलाई सूचना चुहाएका कारण बजेटको पूर्वसन्ध्यामा विद्युतीय गाडीको आयात बढ्यो र राजस्व घाटा लाग्यो भन्ने आरोप पुष्टि गर्न चुनौति दिएका छन् ।
बिहीबार संसदको सार्वजनिक लेखा समितिमा आयोजित छलफलमा अर्थमन्त्री डा. वाग्लेले सूचना चुहावट गरेको प्रमाण दिए आफूले सार्वजनिक जीवन नै त्याग गर्ने बताएका हुन् ।
नैतिकताको उच्च कसिमा उभिएर बनाएको छबि धमिल्याउन नियोजित रुपमा मानिसहरु लागेको र बदनाम गर्ने प्रयास गरेको भन्दै उनले यस्तो चुनौति दिएका हुन् ।
‘दुई अर्ब होइन, दुई रुपैयाँ मात्रै बेइमानी गरेको प्रमाण दिनुस्, अर्थमन्त्री र राजनीति मात्रै होइन सार्वजनिक जीवन नै त्यागिदिन्छु’ अर्थमन्त्री डा. स्वर्णिम वाग्लेले भने, ‘यो नैतिकता अन्य कोही सांसद वा राजनीति गर्नेहरुमा छ ?’
