अमेरिकी सेनाले फेरि इरानमाथि आक्रमण गरेपछि इरानले होर्मुज जलडमरूमध्यमा रहेका जहाजहरूलाई निशाना बनाएको जनाएको छ ।
इरानको इस्लामिक रिभोलुसनरी गार्ड्स कोर्प्सका अनुसार होर्मुज जलडमरूमध्यमा सञ्चालित जहाजमाथि आक्रमण गरिएको छ ।
यसअघि अमेरिकी राष्ट्रपति डोनाल्ड ट्रम्पले इरानले युद्ध अन्त्यका लागि सम्झौता गर्न ढिलाइ गरेको आरोप लगाउँदै कडा कारबाही गरिने चेतावनी दिएका थिए । अमेरिकी सेनाको केन्द्रीय कमाण्डले बुधबार इरानको निरन्तर र अनावश्यक आक्रामक गतिविधिको प्रत्युत्तरका रुपमा आक्रमण सुरु गरिएको जनाएको थियो ।
यसपछि इरानको आईआरजीसीले होर्मुज जलडमरूमध्यमा रहेका दुईवटा जहाजमाथि आक्रमण गरेको छ ।
साथै, फारसको खाडीस्थित इरानको क़ेश्म द्वीपमा विस्फोटका आवाज सुनिएको सञ्चार माध्यमहरुले जनाएका छन् । बन्दर अब्बास, सिरिक तथा अन्य केही सहरमा पनि विस्फोटका समाचार आएका छन् ।
अमेरिकी आक्रमणको जवाफमा इरानी सरकारी सञ्चारमाध्यमहरूले होर्मुज जलडमरूमध्यलाई “सबै प्रकारका जहाजका लागि पूर्ण रूपमा बन्द गरिएको” बताएका छन् । इरानी राष्ट्रपति मसूद पेजेश्कियानले इरान कुनै पनि दबाब वा धम्कीसमक्ष नझुक्ने बताएका छन् ।
अप्रिलमा अमेरिका र इरानबीच युद्धविरामको प्रारम्भिक सहमति भएको थियो । १५ दिनका लागि लागू रहने भनिएको उक्त युद्धविरामको अवधि सकिएपछि दुवै पक्षबीच बेलाबेला गोलीबारी तथा सीमित सैन्य कारबाही भइरहे पनि पूर्ण युद्धमा परिणत भने भइसकेको थिएन ।
तर, वासिङ्टन र तेहरानबीच वार्ता गराउने प्रयासहरू अवरुद्ध भएपछि आक्रमण सुरु भएको छ । इरानले मंगलबार एक अमेरिकी हेलिकोप्टर खसालिदिएको बताइएको छ ।
त्यसपछि अमेरिकाले इरानका केही सैन्य केन्द्रहरूमा आक्रमण गर्यो भने जवाफमा इरानले मध्यपूर्वस्थित अमेरिकी सैन्य अड्डाहरूलाई निशाना बनाएको जनाएको छ ।
