भारतको बिहार सरकारले नेपालको पशुपतिनाथ मन्दिर र झारखण्डको बैद्यनाथ धामबीच २५० किलोमिटर लामो उच्च गतिको एक्सप्रेसवे (हाई-स्पीड करिडोर) निर्माण गर्ने प्रस्ताव अघि सारेको छ। यो परियोजनाले दुई प्रमुख धार्मिक स्थलहरूबीचको यात्रा समयलाई १३ घण्टाबाट घटाएर मात्र ३ घण्टामा झार्ने अपेक्षा गरिएको छ।
भारतीय संचारमाध्यमहरुका अनुसार बिहारका सडक निर्माण मन्त्री दिलीप कुमार जैसवालले फेब्रुअरी १०, २०२६ मा राज्य विधानसभामा सडक निर्माण विभागको आर्थिक वर्ष २०२६-२७ को बजेट (८ हजार २६० करोड रुपैयाँभन्दा बढी) प्रस्तुत गर्दै यो घोषणा गरेका हुन्। प्रस्तावित पशुपतिनाथ–बैद्यनाथ धाम हाई-स्पीड करिडोर काठमाडौंबाट सुरु भएर नेपालको भिमनगर र बिरपुर क्षेत्र हुँदै बिहारको सुपौल जिल्लाबाट भारत प्रवेश गर्नेछ। त्यसपछि यो बिहारका मधेपुरा, सहरसा, खगडिया, मुंगेर र बांका जिल्लाहरू हुँदै झारखण्डको देवघरस्थित बैद्यनाथ धाम पुग्नेछ।
यो परियोजना हाल प्रस्तावित चरणमा रहेको छ। निर्माण सुरु हुने मिति, कुल लागत, कोषको स्रोत (बिहार सरकार, केन्द्र सरकार वा संयुक्त) र सम्पन्न हुने समयबारे अझै कुनै आधिकारिक विवरण सार्वजनिक भएको छैन। बिहार सरकारको यो पहल धार्मिक पर्यटनलाई बढावा दिने र नेपाल–भारतबीचको सांस्कृतिक तथा आर्थिक सम्बन्धलाई थप मजबुत बनाउने लक्ष्यसहित अघि बढाइएको बताईएको छ।
यो एक्सप्रेसवे बनेपछि लाखौं श्रद्धालुहरूका लागि पशुपतिनाथ र बैद्यनाथ धामको यात्रा सजिलो र छोटो हुनेछ, जसले दुवै देशको पर्यटन क्षेत्रलाई ठूलो फाइदा पुर्याउने विश्वास गरिएको छ।
