नेपालमा यस वर्षपनि फिफा विश्वकप हिमालयन टिभीबाट प्रसारण हुने भएको छ। नेपालमा फिफा विश्वकप २०२६ को प्रसारण अधिकार पाएको Acepro Media ले हिमालयन टिभी मार्फत विश्वकप प्रसारण गर्ने गरि सम्झौता गरेको हो।
हिमालयन टिभीका अध्यक्ष धर्मराज भुषालले विश्वकप हिमालयन टिभीमा आउने घोषणा गर्दै र त्यसको लागि हिमालयन स्पोर्ट्स नामको च्यानल सार्वजनिक गरेका हुन् । उनका अनुसार यस वर्ष पनि सब्स्क्रिप्सन मोडलमा विश्वकप प्रसारण हुनेछ । यस अघिको सब्स्क्रिप्सन मोडल सफल भएकोले अहिले पनि सोहि मोडलमा जान लागेको उनले जानकारी दिए । अर्थात् विश्वकप हेर्न यस पटक पनि अघिल्लो पटकको जस्तै पैसा तिर्नु पर्ने छ ।
त्यस्तै यस पटक मोबाइलमा पनि विश्वकप हेर्न सकिने छ। त्यसको लागि OTT प्लेटफर्म DGO प्लेटफर्म सार्वजनिक गरिएको छ।
टिभीमा विश्वकप हेर्न भने ९९९ रुपैयाँ तिर्नु पर्ने छ । OTT प्लेटफर्म DGO मा हेर्न भने ५४९ रुपैयाँ तिर्नु पर्ने छ। यसले सबै खेलहरु हेर्न पाइने हिमालयन टिभीले जनाएको छ । अघिल्लो पटक ५०० रुपैयाँ शुल्क रहेकोमा यस पटक शुल्क दोब्बर भएको हो।
नेपालको लागि विश्वकप प्रसारण अधिकार Acepro Media ले पाएको थियो । अघिल्लो पटक Acepro ले १५ लाख डलर तिरेर अधिकार पाएकोमा यस पटक १७ लाख ७५ हजार डलर तिरेर अधिकार पाएको अध्यक्ष सोम धितालले बताए । Acepro मिडिया हबको सहायक कम्पनी हो।
