टि २० विश्वकप क्रिकेट प्रतियोगिता आज शनिवारदेखि सुरु हुँदैछ । यस पटकको प्रतियोगिता भारत र श्रीलंकाले संयुक्त रूपमा आयोजना गरेका छन् ।
विश्वकपको उद्घाटन खेलमा आज नेपाली समय अनुसार ११:१५ बजे नेदरल्याण्ड र पाकिस्तान भिड्ने छन् । त्यस्तै आज थप दुई खेल पनि हुनेछ। जसमा ३:१५ बजे स्कटल्याण्ड र वेस्टइन्डिज भिड्ने छन् भने साझ ७:१५ बजे भारत र अमेरिकाबीचको खेल हुनेछ।
२० टिमहरू सहभागी भएको यस विश्वकपमा नेपाल पनि समावेश भएको छ । नेपाल समूह सी मा रहेको छ, जसमा इंग्ल्यान्ड, वेस्ट इन्डिज, स्कटल्यान्ड र इटाली पनि छन्। नेपालको पहिलो खेल आइतबार (माघ २५ ) मा इंग्ल्यान्डविरुद्ध मुम्बईको वानखेडे स्टेडियममा दिउँसो ३:१५ बजे सुरु हुनेछ। नेपालले माघ २९ मा इटालीसंग, फागुन ३ मा वेस्ट इन्डिजसंग र फागुन ५ मा स्कटल्यान्डसँग खेल्ने छ । नेपालको सबै खेल मुम्बईको वानखेडे स्टेडियममा हुनेछ । समूह चरणको खेलहरुपछि शिर्ष २ मा रहने २ टिम अर्को चरण प्रवेश गर्ने छन् ।
नेपालले यसअघि दुवै वटा अभ्यास खेल जितेको थियो , जसले टिममा आत्मविश्वास बढाएको छ। नेपाली खेलाडीहरूले विश्वस्तरका टिमहरूसँग प्रतिस्पर्धा गर्ने अवसर पाएका छन्, र समर्थकहरूले नेपालको जितको आशा गरेका छन्।
नेपालले तेस्रो पटक टि २० विश्वकप खेल्न लागेको हो।
