विश्व फुटबलको सबैभन्दा ठूलो प्रतियोगिता फिफा विश्वकप २०२६ का लागि अर्जेन्टिना र इरानले आफ्नो स्थान पक्का गरेका छन्। मंगलबार भएको छनोट खेलहरूको नतिजापछि यी दुई टोलीले संयुक्त राज्य अमेरिका, क्यानडा र मेक्सिकोमा आयोजना हुने ४८ टोली सम्मिलित विश्वकपमा आफ्नो यात्रा सुनिश्चित गरेका हुन्।
बोलिभियाले उरुग्वेसँग बराबरी खेलेपछि सन् २०२२ को विश्वकप विजेता अर्जेन्टिनाले दक्षिण अमेरिकी छनोटमा शीर्ष स्थान कायम राख्दै औपचारिक रूपमा छनोट भएको हो। त्यसको केही समय पछि अर्जेन्टिनाले ब्राजिललाई ४-१ गोल अन्तरले हराएको थियो। ब्राजिलसंगको खेल अघि नै अर्जेन्टिना विश्वकपको लागि छनौट भईसकेको थियो । हाल अर्जेन्टिनाले १४ खेलबाट ३१ अंक जोडेको छ र छनोट चरणमा अझै ३ खेल बाँकी रहँदा पनि शीर्ष छ स्थानभित्र पर्ने निश्चित भएको छ। यससँगै अर्जेन्टिनाले आफ्नो उपाधि रक्षा गर्ने अवसर पाएको छ।
यसैगरी, एसियाली छनोटमा इरानले उज्बेकिस्तानसँग २-२ को बराबरी खेल्दै विश्वकपमा स्थान बनायो। इरानका स्टार खेलाडी मेहदी तारेमीले दुई गोल गर्दै टोलीलाई चौथो पटक लगातार र समग्रमा सातौँ पटक विश्वकपमा पुर्याएका हुन्। इरानले समूह ‘ए’ मा शीर्ष दुई स्थान पक्का गरेको छ।
हालसम्म विश्वकप २०२६ का लागि आयोजक राष्ट्रहरू अमेरिका, क्यानडा र मेक्सिकोसहित जापान, न्यूजिल्यान्ड, अर्जेन्टिना र इरान छनोट भइसकेका छन्। यो विश्वकप जुन ११, २०२६ मा सुरु भई जुलाई १९ मा समापन हुनेछ। बाँकी ४१ स्थानका लागि छनोट प्रक्रिया जारी छ र फुटबल प्रशंसकहरू उत्साहित छन्।
