नेपाल क्रिकेट संघ (क्यान)ले वर्ष २०२५ का लागि आफ्नो वार्षिक क्यालेन्डर सार्वजनिक गरेको छ । पत्रकार सम्मेलनमार्फत क्यानका सचिव पारस खड्काले नेपालले सन् २०२५ मा खेल्ने राष्ट्रिय तथा अन्तर्राष्ट्रिय प्रतियोगिताको तालिका सार्वजनिक गरेका हुन् ।
क्यानको क्यालेन्डर अनुसार नेपाली राष्ट्रिय पुरुष क्रिकेट टिमले अप्रिलमा हङकङमा चार देशीय सिरिज खेल्नेछ । यो खेल २०२५ को पहिलो खेल हुनेछ । अप्रिल ९ देखि १३ सम्म हुने सिरिजमा नेपालसहित हङकङ, कतार र नामिबिया सहभागी हुनेछन् ।
मे १५ देखि ३० सम्म प्रि टुर टु यूके हुनेछ । यस लगत्तै जुन महिनामा दुई अन्तर्राष्ट्रिय सिरिज हुनेछ । जुन २ देखि १२ सम्म विश्वकप लिग–२ अन्तर्गत स्कटल्यान्ड, नेपाल र नेदरल्यान्ड्सबीचको सिरिज हुनेछ । जुनमै स्कटल्यान्ड र नेपालबीच टी–२०आई हुनेछ ।
जुलाईमा टी–२० विश्वकप छनोटको तयारीका लागि श्रीलङ्कामा क्याम्प सञ्चालन हुनेछ । अगस्टमा भारतमा पकेट क्याम्प हुनेछ । अगस्टमै नेपालले विश्वकप छनोटको तयारीका लागि अस्टे«लिया टुर गर्नेछ ।
सेप्टेम्बरमा यूएईमा टेस्ट राष्ट्रसँग टी–२० आई सिरिज खेल्नेछ । कुन देशसँग यो सिरिज खेल्ने भन्ने खुलाइएको छैन ।
अक्टोबर १ देखि १७ सम्म ओमनमा टी–२० विश्वकप छनोट हुनेछ । अक्टोबर २३ देखि नोभेम्बर ४ सम्म यूएई र अमेरिकासँग विश्वकप लिग–२ अन्तर्गतको सिरिज चल्नेछ ।
नोभेम्बरमा नेपालले हङकङ सिक्सेस खेल्नेछ । डिसेम्बरमा ओमन र यूएईसँग लिग–२ र ओमनसँग टी–२०आई सिरिज खेल्ने छ । यस आधारमा नेपाली राष्ट्रिय पुरुष क्रिकेट टिम वर्ष २०२५ मा हरेक महिना व्यस्त हुनेछ ।
क्यानले महिला टोलीको पनि तालिका सार्वजनिक गरेको छ । यस्तै, घरेलु लिग पनि महिनैपिच्छे चल्ने गरि तालिका तयार पारिएको छ ।
