भारत सरकारले सुन आयातमा लाग्ने भन्सार दर १५ प्रतिशतबाट ६ प्रतिशतमा झारेपछि नेपालभन्दा भारतमा सुन सस्तो भएको छ । यसअघि भारतमा सुन आयात गर्दा १५ प्रतिशत भन्सार लाग्ने गरेको थियो । गत मंगलबार आगामी वर्षको बजेट सार्वजनिक गर्दै भारतीय वित्तमन्त्री निर्मला सीतारमणले भन्सार दर ६ प्रतिशतमा झारिन् ।
यसअघि नै नेपालभन्दा भारतमा सुन सस्तो रहेकोमा भन्सार दर घटेसँगै नेपालको तुलनामा भरतमा सुन अझै सस्तो भएको छ ।
गत जेठ १५ गते पूर्वअर्थमन्त्री वर्षमान पुनले बजेटमार्फत् सुनमा लाग्दै आएको भन्सार १५ प्रतिशतबाट बढाएर २० प्रतिशत पुर्याए । तर, भारतले भन्सार दर घटाएपछि भारतमा अझै सुनको मूल्य घट्ने देखिएको छ ।
आज बिहिबार नेपालमा छापावाला सुन प्रतितोला एक लाख ४५ हजार र तेजाबी सुन प्रतितोला एक लाख ४४ हजार ३०० रुपैयाँमा कारोबार भइरहेको छ । भारतमा नेपालको तुलनामा तोलामै ४३ हजार रुपैयाँसम्म सुन सस्तो पर्ने देखिएको छ ।
नेपालमा महँगो भएपछि भारतबाट नेपालतर्फ सुनको तस्करी हुने चिन्ता थपिएको छ । खुला सीमानाका कारण सुनको तस्करी बढ्ने चिन्ता व्यवसायीहरुले गरेका छन् ।
यसअघि पनि नेपालमा सुन तस्करी हुने गरेको र अब यो क्रम झन बढ्ने शंका व्यवसायीहरूको छ ।
