नेपाली जुत्ता चप्पल ब्राण्ड गोल्डस्टारले भारतीय सरकारबाट ‘इन्डियन स्ट्याण्डर्स’ प्राप्त गरेको छ । यसअघि पनि भारतमा निकासी हुँदै आएकोमा भारतीय सरकारले ‘ब्यूरो अफ इन्डियन स्ट्याण्डर्ड’ (बीआईएस) अनिवार्य गरेपछि गोल्डस्टार जुत्ता चप्पलको निकासी रोकिएको थियो ।
तर, अहिले गोल्डस्टारले बीआईएस प्राप्त गरेको र भारतीय बजारमा माग अनुसार जुत्ता चप्पल पठाउने तयारी गरिएको किरण सुज म्यानुफ्याक्चर्सकी प्रबन्ध निर्देशक विदूषी राणाले जानकारी दिइन् । उनका अनुसार गोल्डस्टारले पहिलोपटक भारतबाट ‘ब्यूरो अफ इन्डियन स्ट्याण्डर्ड’ प्राप्त गरेको हो ।
‘यसअघि जुत्ता चप्पलमा बीआईएस अनिवार्य थिएन, अहिले भारतीय सरकारले अनिवार्य गरेपछि हामीले आवेदन दिएका थियौँ, भारतीय पक्षले हामीलाई बीआईएस प्रदान गरिसकेको छ’ राणाले भनिन्, ‘अब भारतीय स्ट्याण्डर्ड प्राप्त भएपछि हामीलाई पनि थप सजिलो भएको छ, भारतीय बजारमा उपस्थिति बढाउन पनि मद्दत पुग्ने विश्वास लिएका छौँ ।’
भारतमा गोल्डस्टारको वार्षिक १५० करोड रुपैयाँ बराबरको बजार रहेको उनको भनाइ छ । उनका अनुसार विगतमा भारतमा गोल्डस्टारले वार्षिक ३०० करोडसम्म ब्यापार गथ्र्यो ।
भैरहवास्थित उद्योगबाट जुत्ता चप्पल उत्पादन गरेर भारतीय बजारमा पठाइने प्रबन्ध निर्देशक राणाको भनाइ छ । उनका अनुसार विशेष आर्थिक क्षेत्र (सेज) भित्र पनि उद्योग राख्ने योजनामा कम्पनी छ ।
