यस वर्षको मनसुन प्रणाली नेपालको ५ वटा प्रदेशमा पुगेको छ। जल तथा मौसम विज्ञान विभागको मौसम पूर्वानुमान महाशाखाका अनुसार आज २०८१/०३/०६ (२० जुन) गतेका दिन कोशी प्रदेशको बाँकी भू-भाग, मधेश प्रदेश, बागमती प्रदेश, गण्डकी प्रदेशका अधिकांश भू-भागमा र लुम्बिनी प्रदेशका पूर्वी भू-भागमा आगमन भएको छ ।
नेपालमा यस वर्षको मनसुन औसत मिति भन्दा तीन दिन छिटो गरी मिति २०८१/०२/२८ ( १० जुन) मा कोशी प्रदेशको पुर्वी भू-भागमा आगमन भएको थियो । नेपालको बाँकी भू-भागहरूमा मनसुन भित्रिन अझै केही दिन लाग्ने संभावना रहेको विभागले जनाएको छ।
यस वर्षको मनसुनी प्रणालीलाई मौसम पूर्वानुमान महाशाखाले निरन्तर अनुगमन गरिरहेको र सोही अनुसार नियमित रूपमा अद्यावधिक गर्दै जाने महाशाखाले जनाएको छ।
