चालु आर्थिक वर्ष २०८१/८२ को तेस्रो त्रैमासमा प्रभु बैंकको खुद नाफा ३.५१ प्रतिशतले बढेको छ। यस अवधिमा बैंकले १ अर्ब ८७ करोड खुद नाफा कमाएको छ। अघिल्लो आर्थिक वर्षको यसै अवधिमा बैंकको खुद नाफा १ अर्ब ८१ करोड मात्रै थियो।
यस अवधिमा बैंकको खुद ब्याज आम्दानी ८ अर्ब ४३ करोडबाट घटेर ७ अर्ब ८ करोड पुगेको छ। बैंकको संचालन आम्दानी १० अर्ब १९ करोडबाट घटेर ९ अर्ब ६१ करोड पुगेको छ। यस अवधिमा बैंकले सम्भावित जोखिमको लागि छुट्याएको इम्पेयरमेन्ट चार्ज शिर्षकको खर्च १ अर्ब ७५ करोडबाट घटेर १ अर्ब २३ करोड मात्र कायम भएको छ। यस कारण बैंकको खुद ब्याज आम्दानी घटे पनि खुद नाफा बढेको देखिन्छ।
यस अवधिमा बैंकको वितरणयोग्य मुनाफा भने ऋणात्मक ३ अर्ब ४० करोड रुपैयाँ रहेको छ। बैंकको वार्षिकीकरण गरिएको प्रति शेयर आम्दानी १०.६३ रुपैयाँ रहेको छ भने प्रति शेयर नेटवर्थ १४७ रुपैयाँ २९ पैसा रहेको छ।
२३ अर्ब ५४ करोड चुक्ता पुँजी रहेको बैंकको रिजर्भमा १४ अर्ब ५३ करोड रहेको छ।
