सिनर्जी पावर डेभलपमेन्ट कम्पनीले चालु आर्थिक वर्ष २०८१/८२ को दोस्रो त्रैमासको अपरिस्कृत वित्तीय विवरण प्रकाशन गरेको छ। प्रकाशित वित्तीय विवरण अनुसार यस अवधिमा कम्पनीको खुद नाफा २९.०३ प्रतिशतले बढेको छ।
यस अवधिमा कम्पनीले ४ करोड ४९ लाख ६२ हजार खुद नाफा कमाएको छ। अघिल्लो आर्थिक वर्षको यसै अवधि कम्पनीको खुद नाफा ३ करोड ४८ लाख ९६ हजार रुपैयाँ रहेको थियो। यस अवधिमा कम्पनीको विद्युत बिक्रीको आम्दानी भने ५.२५ प्रतिशतले घटेको छ। कम्पनीको विद्युत बिक्रीको आम्दानि १२ करोड ६ लाखबाट घटेर ११ करोड ४३ लाखमा सिमित भएको छ। नेपाल विद्युत प्राधिकरणको निर्देशनको कारण आयोजना पूर्ण क्षमतामा संचालन गर्न नमिलेकोले विद्युत बिक्रीको आम्दानी घटेको कम्पनीले जनाएको छ ।
यस अवधिमा कम्पनीले प्रशासनिक तथा अन्य खर्च भने २३ प्रतिशतले घटाएको छ। कम्पनीको प्रशासनिक तथा अन्य खर्च ७ करोड ६१ लाखबाट घटेर ५ करोड ८६ लाखमा सिमित भएको छ। विद्युत बिक्रीको आम्दानी घटे पनि कम्पनीले प्रशासनिक तथा अन्य खर्च घटाएकोले कम्पनीको खुद नाफा बढेको हो ।
यस अवधिमा कम्पनीको वार्षिकीकरण गरिएको प्रति शेयर आम्दानी ७.४३ रुपैयाँ रहेको छ भने प्रति शेयर नेटवर्थ ११४.०७ रुपैयाँ रहेको छ । १ अर्ब २० करोड ९८ लाख चुक्ता पुँजी रहेको कम्पनीको रिजर्भमा १४ करोड ३६ लाख रहेको छ।
कम्पनीले सोलुखुम्बु जिल्लामा निर्माण हुने मध्य होड खोला “ए” जलविद्युत आयोजना ( २२ मे.वा.) को प्रबर्द्धक कम्पनी एपेक्स मकालु हाइड्रो पावर लिमिटेडमा ४० प्रतिशत स्वपूँजी लगानी गर्ने प्रतिवद्धता बमोजिम ४४ करोड २७ लाख ४४ हजार रुपैयाँ लगानी गरेको छ । उक्त आयोजना हाल निर्माणाधिन अवस्थामा रहेको छ ।
