इमर्जिङ नेपाल लिमिटेडका केही ठूला शेयरधनी धमाधम शेयर बेचेर बाहिरिन थालेका छन् । कम्पनीको शेयरको लकइन अवधि २०८१ फागुन ३ गते नै सकिएको थियो। तर आईजीन विवादका कारण लकइन अवधि सकिएपनि संस्थापक शेयरधनीले शेयर बेच्न पाएका थिएनन् ।
अब भने एकल आईजीन नै कायम हुने गरि नेपाल धितोपत्र बोर्ड र सीडीएससीले निर्णय गरेर कम्पनीलाई पत्राचार गरेसंगै आधारभुत शेयरधनीलाई शेयर बिक्री गर्ने बाटो खुलेको हो। धितोपत्र बोर्डले जारी गरेको निर्देशन अनुसार कम्पनीका ठूला शेयरधनीले धमाधम शेयर बिक्री गर्न लागेको जानकारी नेप्सेमा गराउन थालेका छन् ।
आज मात्रै जीव नाथ लामिछानेले २ लाख ५० हजार २० कित्ता शेयर बेच्ने जानकारी नेप्सेमा गराएका छन् । विशाल अग्रवालले ५६ हजार ६ सय ७१ कित्ता शेयर बिक्री गर्न लागेको जानकारी आजै नेप्सेमा दिएका छन् ।
यस अघि रिजेन्सी ट्रेडिङ प्रालिले १ लाख कित्ता, विशाल अग्रवालले १ लाख ६७ हजार २ सय ३५ कित्ता, जगदीश प्रसाद अग्रवालले ६९ हजार ४ सय ५० कित्ता, निकुन्ज अग्रवालले १ लाख ६६ हजार ६ सय ८० कित्ता, अनुज अग्रवालले ९१ हजार ६ सय ७४ कित्ता र युनाईटेड डिस्ट्रीब्युटर्सले २ लाख ६२ हजार ५ सय कित्ता शेयर बेच्न लागेको जानकारी नेप्सेमा दिइसकेका छन् ।
कम्पनीको सबैभन्दा ठूलो शेयरधनी चन्द्र ढकाल हुन् । उनीसँग कम्पनीको १३.५० प्रतिशत अर्थात् ७ लकः ५० हजार ६० कित्ता शेयर छ ।
लकइन अवधि खुलेर आईजीन विवाद समाधान भएपछि कम्पनीका ठूला शेयरधनीले शेयर बिक्री तिब्र बनाएका हुन् । कम्पनीका प्रमोटरहरुले शेयर बिक्री गर्न थालेपछि कम्पनीको शेयर मूल्य पछिल्लो केही दिनदेखि नकारात्मक सर्किट लागिरहेको छ ।
धितोपत्र बोर्डले आधारभूत शेयरधनीलाई आफुसँग भएको मध्ये ५ प्रतिशत वा सो भन्दा बढी शेयर बिक्री गर्ने भए नेप्से मार्फत जानकारी गराउन भनेको छ । तर यदि कसैले आफुसँग भएको मध्ये ४.९९ प्रतिशत शेयर मात्र बेच्ने हो भने जानकारी गराउनु पर्ने छैन । यसो हुँदा कतिपय ठूला लगानीकर्ताले ४.९९ प्रतिशत मात्र शेयर बिक्री गरेको आँकलन गरिएको छ ।
