आदिकवि भानुभक्त आचार्यका समकालीन तथा युवा पुस्तामा साहित्यिक चेतना जगाउने साहित्यकार मोतीराम भट्टको १६१औँ जन्मजयन्तीका अवसरमा रिडर्स इन्टरनेशनल मोडेल स्कुलले बृहत् आशु कविता लेखन तथा वाचन प्रतियोगिता सम्पन्न गरेको छ ।
विद्यालयमा आयोजित प्रतियोगितामा विभिन्न २६ विद्यालयका २९ जना विद्यार्थीको सहभागिता रहेको थियो । प्रतियोगितामा सरस्वती माध्यमिक विद्यालयका सिर्जन गौतम प्रथम, साँग्रिला पब्लिक स्कुलका सन्तोष विक दोस्रो र रिपुमर्दिनी सैनिक विद्यालयका सन्तोष कोइराला तेस्रो भएका छन् । त्यसैगरी प्रोत्साहनतर्फ बाल संसार स्कुलकी आयुष्का रिजाल र सुनौलो भविष्य स्कुलकी सृष्टि बुढाथोकी पनि पुरस्कृत भएका छन् ।
प्रतियोगितामा प्रथम, द्वितीय र तृतीय हुने विद्यार्थीले क्रमशः ५ हजार, ३ हजार ५ सय र २ हजार ५ सय नगदसहित प्रमाणपत्र प्राप्त गरेका छन् । प्रोत्साहन पुरस्कार प्राप्त दुवै विद्यार्थीलाई जनही १ हजार नगद तथा प्रमाणपत्र प्रदान गरिएको थियो । यस्तै, आन्तरिकतर्फ रिडर्स इन्टरनेशनल मोडेल स्कुलकी रोजिना मोक्तान उत्कृष्ट घोषित हुँदै १ हजार नगद तथा प्रमाणपत्र प्राप्त गरेकी छिन् ।
रिडर्स इन्टरनेशनल मोडेल स्कुलले विगत १९ वर्षदेखि निरन्तर रूपमा आशु कविता लेखन तथा वाचन प्रतियोगिता आयोजना गर्दै आएको छ । प्रतियोगिताको पूर्वतयारीस्वरूप कवि रूपक अलङ्कार तथा देवु लुइँटेलले सहभागी विद्यार्थीहरूलाई कविता लेखन तथा वाचनसम्बन्धी प्रशिक्षणसमेत दिएका थिए ।
साहित्यकार रमेश शुभेच्छुको प्रमुख आतिथ्यतामा सम्पन्न कार्यक्रममा गोविन्द घिमिरे ‘वेदमणि’, बाजुरामप्रसाद पौडेल, साधना खतिवडा, राजकुमार श्रेष्ठ, कुमार अधिकारी, गणेश खतिवडा, यादव घिमिरे, थानेश्वर भुसाल र गुरुप्रसाद लुइँटेललगायतको आतिथ्य रहेको थियो ।
विद्यालय व्यवस्थापन समितिका अध्यक्ष झविन्द्रकुमार सुवेदीको अध्यक्षतामा सम्पन्न कार्यक्रममा विद्यालयका प्रिन्सिपल बालमुकुन्द कार्कीले स्वागत मन्तव्य व्यक्त गरेका थिए । कार्यक्रमको सञ्चालन रामकुमार भट्टराईले गरेका थिए ।
प्रतियोगिताले विद्यार्थीमा सिर्जनात्मक क्षमता, साहित्यप्रतिको रुची तथा तत्कालै विषयलाई कविताका रूपमा अभिव्यक्त गर्ने सीप विकासमा महत्वपूर्ण योगदान पुर्याएको आयोजकले जनाएको छ ।
