साताको पहिलो दिन आज आइतबार शेयरबजार परिसूचक नेप्से दोहोरो अंकले बढेको छ। आज नेप्से सूचक ४७.५५ अंकले बढेर २६३३.४२ को बिन्दुमा पुगेको छ।
आज बिहान राष्ट्रिय स्वतन्त्र पार्टीका सभापति रवि लामिछाने र काठमाडौँ महानगरपालिकाका मेयर बालेन शाहबीच एकताको सम्झौता भएसँगै शेयर लगानीकर्ता पनि उत्साहित भएको देखिन्छन् । आज कारोबारमा आएका सबै उपसूचकहरु बढेका छन् । जसमा फाइनान्स समूह सर्वाधिक २.७० प्रतिशतले बढेका छन् ।
आज कारोबारमा आएका ३२८ कम्पनीका १ करोड ३४ लाख ६८ हजार १ सय ४५ कित्ता शेयर खरिद बिक्रीबाट ५ अर्ब ५३ करोड १३ लाख ७० हजार ६१ रुपैयाँ ५८ पैसाको कारोबार भएको छ। जस मध्ये युनियन हाइड्रोको सर्वाधिक २७ करोड ६० लाखको कारोबार भएको छ भने मन्जुश्री फाइनान्सको २४ करोड ८९ लाखको कारोबार भएको छ ।
आज कारोबारमा आएका मध्ये मिड सोलु हाइड्रोको शेयर मूल्य सर्वाधिक ९.४९ प्रतिशत बढेको छ भने जोशी हाइड्रोको शेयर मूल्य ६.९७ प्रतिशत बढेको छ। त्यस्तै अपर स्यांगे हाइड्रोको शेयर मूल्य ६.५२ प्रतिशतले बढ्दा रुरु जलविद्युतको शेयर मूल्य ५.१६ प्रतिशतले बढेको छ।
आज कारोबारमा आएका मध्ये विन नेपाल लघुवित्तको शेयर मूल्य सर्वाधिक १० प्रतिशत घटेको छ। कम्पनीलाई स्वरोजगार लघुवित्तले गाभ्ने भएपछि कम्पनीको शेयर मूल्यमा गिरावट आएको हो।
