नेपाल स्टक एक्सचेन्ज नेप्सेले ग्रामीण विकास लघुवित्त र समाज लघुवित्तको शेयर कारोबार रोक्का गरेको छ । नेप्सेले कार्तिक २ गतेदेखि लागु हुने गरि दुवै कम्पनीको शेयर कारोबार रोक्का गरेको हो।
ग्रामीण विकास लघुवित्त वित्तीय संस्था र समाज लघुवित्त वित्तीय संस्थाले मर्जरपछि कार्तिक २ गतेबाट एकिकृत कारोबार सुरु गर्दै छन् । ग्रामीण विकास लघुवित्त वित्तीय संस्था लिमिटेडको नामबाट एकिकृत कारोबार हुन लागेको हो । मर्जरपछि कम्पनीको केन्द्रीय कार्यालय बुटवलमा रहने छ।
यी दुई संस्थाबीच फागुन १७ गते मर्जर सम्झौतामा हस्ताक्षर भएको थियोे । गत असार २८ गते दुवै कम्पनीको साधारणसभाले मर्जर प्रस्ताव पारित गरेका थिए। नेपाल राष्ट्र बैंकले असोज २३ गते र कम्पनी रजिष्ट्रारको कार्यालयले असोज २६ गते मर्जरको लागि अन्तिम स्वीकृति प्रदान गरेको हो । दुई कम्पनी १:१ को समान स्वापमा मर्ज हुन लागेका हुन्।
एकिकृत कारोबार हुने भएकोले डाटा माइग्रेसन कार्यको लागि दुवै कम्पनीको बैंकिंग कारोबार कार्तिक १ गते बन्द रहने भएको छ। शेयर लगत एकिकरण तथा मिलानको लागि शेयर कारोबार समेत रोक्का हुन लागेको हो।
ग्रामीण विकास लघुवित्तको केन्द्रीय कार्यालय बुटवलमा रहेको छ भने समाज लघुवित्तको केन्द्रीय कार्यालय सर्लाहीमा रहेको छ। ग्रामीण विकासको चुक्ता पुजी ९८ करोड २५ लाख रहेको छ भने समाजको पुजी २ करोड २८ लाख ५० हजार मात्र छ।
हाल ग्रामिण विकास लघुवित्तको शेयर मूल्य ७८० रुपैयाँ रहेको छ भने समाज लघुवित्तको शेयर मूल्य १८७५ रुपैयाँ रहेको छ।
