शेयरबजारमा लगानीकर्ताको आकर्षण बढिरहँदा आईपीओको नतिजा हेर्ने सीडीएसको वेबसाइट भने डाउन भएको छ । यस कारण सोलु हाइड्रोपावर लिमिटेडको आईपीओ आज सोमबार बाँडफाँड भए पनि राति अबेरसम्म लगानीकर्ताले आईपीओ नतिजा हेर्न पाएका छन् । सामान्यता आईपीओ बाँडफाँड भएको केहि घण्टामै आईपीओको नतिजा हेर्न मिल्थ्यो ।
तर आज सोलु हाइड्रोको हकमा भने यो समाचार तयार पार्दासम्म नतिजा हेर्न पाएका छैनन् । कम्पनीको आईपीओ दिउँसो ३:३० बजे बाँडफाँड भएको थियो। आईपीओको नतिजा हेर्नको लागि सीडीएससीले संचालनमा ल्याएको https://iporesult.cdsc.com.np/ वेबसाइट यो समाचार तयार पार्दासम्म खुलेको छैन । सो वेबसाइट खोल्दा ‘This site can’t be reached’ भनेर देखाउछ ।
सीडीएससीको वेबसाइटमा समस्या हुँदा बिक्री प्रबन्धकको वेबसाइटबाट पनि लगानीकर्ताले आईपीओको नतिजा हेर्ने गरेका थिए। तर सोलु हाइड्रोको आईपीओको बिक्री प्रबन्धक रहेको नबिल इन्भेष्टमेन्ट र सह बिक्री प्रबन्धक रहेको हिमालयन क्यापिटलको वेबसाइटको आईपीओ नतिजा देखाउने पेजमा सोलु हाइड्रोको पब्लिकतर्फको आईपीओको नतिजा हेर्ने व्यवस्था गरिएको छैन । यो समाचार तयार पार्दासम्म बिक्री प्रबन्धक र सह बिक्री प्रबन्धकले आफ्नो वेबसाइटमा आईपीओ नतिजा अपडेट गरेका छैनन्।
आईपीओ नतिजा प्रकाशन हुन नसकेको बारे सीडीएसले , नबिल इन्भेष्टमेन्ट र हिमालयन क्यापिटलले केही पनि जानकारी दिएका समेत छैनन् । आइपीओ नतिजा पनि प्रकाशन नहुनु र यी २ वटैले यसबारे केही पनि जानकारी नदिनुले लगानीकर्ताले अनेक आरोप लगाउन सुरु गरेका छन् । कतिपय लगानीकर्ताले आईपीओ परेकालाई शेयर नदिएर अरुलाई नै शेयर दिनको लागि चलखेल भईरहेको हुन सक्ने आशंका व्यक्त गरेका छन् ।
कम्पनीले पुस २९ गतेदेखि माघ ४ गतेसम्म आम सर्वसाधारणलाई ८२ लाख कित्ता शेयर निष्काशन गरेको थियो। यस निष्काशनमा कुल २५ लाख ३६ जनाले आवेदन दिएका थिए । जस मध्ये २४ लाख ७१ हजार ७ जनाको आवेदन मात्र योग्य भएको छ । माग भन्दा बढीको आवेदन परेकोले गोलाप्रथाबाट शेयर बाँडफाँड गरिएको छ । जस अनुसार ८ लाख २० हजार जनाले १० कित्ताको दरले कम्पनीको शेयर पाएका छन् । अन्य आवेदक भने हात खाली भएका छन् । तर अझैसम्म आईपीओको नतिजा भने प्रकाशन भएको छैन।
यस कम्पनीले सोलुखुम्बुमा ८२ मेगावाट क्षमताको लोवर सोलु जलविद्युत आयोजना निर्माण सम्पन्न गरि २०८२ साउन २४ गतेदेखि व्यापारिक उत्पादन थालेको छ । सोलु हाइड्रोपावर लिमिटेड त्रिवेणी ग्रुप अन्तर्गतको कम्पनी हो। यस कम्पनीमा त्रिवेणी ग्रुप, विशाल ग्रुप, गोयल ग्रुप, राठी ग्रुप, विद्या ग्रुप र जैन ग्रुपको लगानी छ। कम्पनीमा गोबिन्दलाल संघाईको ८.१६ प्रतिशत, नितेश अग्रवालको ७.०९ प्रतिशत तथा राम चन्द्र संघाईको ४.९३ प्रतिश्सत शेयर लगानी रहेको छ। सुवाष चन्द्र संघाई कम्पनीका अध्यक्ष् हुन् ।
