गार्डियन माइक्रो लाइफ इन्स्योरेन्स लिमिटेडले निष्काशन गरेको आईपीओमा मागभन्दा १३.६५ गुणा बढीको आवेदन परेको छ । आवेदन दिने आज अन्तिम दिन पुस २४ सम्ममा १९ लाख ६ हजार ७ सय ४८ जनाले आवेदन दिएका हुन् ।
यी आवेदकले कुल २ करोड ५१ लाख ९० हजार ३ सय ६० कित्ताको लागि आवेदन दिएका हुन् । यो भनेको माग भन्दा १३.६५ गुणा बढी हो । बैंक तथा वित्तीय संस्थाले आफ्ना शाखामा आएका आवेदनलाई रातिसम्म नै इन्ट्री गर्न पाउने भएकोले यो संख्या अझै बढ्न सक्ने छ ।
कम्पनीले पुस २१ गतेदेखि आम सर्वसाधारणको लागि १८ करोड ४५ लाख रुपैयाँ बराबरको १८ लाख ४५ हजार कित्ता शेयर निष्काशन गरेको थियो। माग भन्दा बढीको आवेदन परेकोले यो आईपीओ गोलाप्रथाबाट बाँडफाँड हुने छ। जसमा १ लाख ८४ हजार ५ सय जनाले मात्र शेयर पाउने छन् । शेयर निष्काशनको लागि कुमारी क्यापिटल बिक्री प्रबन्धक रहेको छ।
कम्पनीले यस अघि नै श्रम स्वीकृति लिई वैदेशिक रोजगारीमा रहेका नेपाली नागरिकलाई आईपीओ निष्काशन गरि बाँडफाँड गरिसकेको छ।
नेपाल धितोपत्र बोर्डले कम्पनीलाई मङ्सिर ७ गते शेयर निष्काशनको अनुमति प्रदान गरेको थियो । बोर्डले कम्पनीलाई कुल २२ करोड ५० लाख रुपैयाँ बराबरको २२ लाख ५० हजार कित्ता शेयर निष्काशनको अनुमति प्रदान गरेको थियो। जस मध्ये २ लाख २५ हजार कित्ता श्रम स्वीकृति लिई वैदेशिक रोजगारीमा रहेका नेपालीलाई, १ लाख १२ हजार ५ सय कित्ता सामुहिक लगानी कोषहरुको लागि , ६७ हजार ५ सय कित्ता कम्पनीका कर्मचारीको लागि , र बाँकि रहेको १८ लाख ४५ हजार कित्ता सर्वसाधारणको लागि छुट्याईएको हो ।
यो पनि : गार्डियन माइक्रो लाइफ आईपीओ रिभ्यु: कस्तो छ कम्पनी, को को छन् ठूला शेयरधनी ?
