आज आइतबार दुई कम्पनीको लाभांश सुरक्षित गर्ने अन्तिम दिन रहेको छ । साधारण सभा तथा लाभांश वितरण प्रयोजका लागि सीईडीबी हाइड्रोपावर एण्ड डेभलपमेन्ट कम्पनी र ओरियण्टल होटलले सोमबार अर्थात असोज ७ गते बुकक्लोज गर्दैछन् ।
यस अनुसार आजसम्म कायम शेयरधनीहरुले यी कम्पनीहरुको साधारणसभामा सहभागिता जनाउन पाउने छन् भने यी कम्पनीहरुले वितरण गर्ने लाभांश पनि प्राप्त गर्न सक्नेछन् ।
सिईडिबि हाइड्रोपावर डेभलपमेन्ट कम्पनीले हाल कायम चुक्ता पूँजीको ११ प्रतिशतका दरले बोनस शेयर वितरण गर्ने र बोनस शेयर वितरणपश्चात ५४.५ प्रतिशत हकप्रद शेयर निष्काशन गर्ने घोषणा गरेको छ । सो प्रस्ताव पारित गर्न कम्पनीले असोज २१ गते वार्षिक साधारण सभा बोलाएको छ ।
उक्त साधारणसभाले बोनस वितरण र हकप्रद निष्काशनको प्रस्ताव पनि पारित गर्नेछ ।
ओरियन्टल होटल्स लिमिटेडले भने असोज २० गते वार्षिक साधारणसभा बोलाएको छ । साधारणसभाले हाल कायम चुक्ता पूँजीको ५ प्रतिशतका दरले बोनस शेयर र सोको कर प्रयोजनार्थ ०.२६३१६ प्रतिशतका दरले नगद लाभांश वितरण गर्ने प्रस्ताव पारित गर्नेछ ।
