भदौ १० गते भोटेकोशी नदीमा आएको प्रलयकारी बाढीका कारण मुलुक अहिले शोकमा छ । करिब ११ सयको शवहरु भेटिएको छ, ४५ सय हाराहारी मानिसहरु अझै पनि सम्पर्कबिहीन छन् । जलविद्युत, सडक, पुल, घर, गाडी लगायतका भौतिक क्षतिको आँकलन गर्नै कठिन छ ।
मानवीय क्षति पछि यो बाढीबाट सबैभन्दा बढी प्रभावित निजी क्षेत्र नै देखिएको छ । क्षतिग्रस्त भएका १५ वटा जलविद्युत आयोजनामध्ये १० भन्दा बढी निजी क्षेत्रकै अगुवाईमा बनेका र बन्दै गरेका आयोजना छन् । केरुङबाट सामान लिएर आउँदै गरेका करिब ४ सय वटा मालबाहक ट्रक बगेका छन् । अटोमोबाइल्स व्यवसायीहरुले दशैँ र तिहारलाई लक्षित गरेर मगाएका ८ सयभन्दा बढी नयाँ गाडी (कारहरु) बाढीमा परेका छन् । स–साना पसलहरु त कति बगे भन्ने अनुमान नै छैन ।
सरकारलाई निजी क्षेत्रकै भरथेग
आफैँ यस्तो महासंकटमा हुँदा पनि उद्योगी व्यवसायीहरुले सरकारलाई दिल खोलेर सहयोग गरिरहेका छन् । कतिसम्म भने, चीनबाट बिवाईडीको गाडी आयात गर्ने साइमेक्स इंक अहिले आफैँ पीडामा छ । यही बाढीमा २ सय हाराहारी गाडी परेर नोक्सानी ब्यहोरे पनि साइमेक्सले प्रधानमन्त्री दैवी प्रकोप उद्वार कोषमा ७ करोड सहयोग गरेको छ ।
जलविद्युत आयोजनाहरु बाढीले क्षतिग्रस्त हुँदा पनि ऊर्जा उत्पादकहरुले आफ्नो पीडा बिर्सिएर १३ करोड रुपैयाँ सरकारी कोषमा सहयोग गरेका छन् ।
वर्तमान सरकार बन्नासाथ सबैभन्दा ठूलो धरपकड ब्यहोरेका उद्योगीहरुले पनि अहिले सहयोगमा कुनै कन्जुस्याईँ गरेका छैनन् । सत्ताको कठोर व्यवहार झेलेपनि अहिलेको विपद्मा निजी क्षेत्रले नै सबैभन्दा पहिला सहयोगको हात अघि बढाए ।
शंकर ग्रुपका संस्थापक शंकर अग्रवाल अहिले पनि थुनामै छन्, तर यो ग्रुपले बाढी प्रभावितहरुको राहत, उद्वार र पुनःस्थापनाका लागि भन्दै ४ करोड रुपैयाँ सहयोग गरेको छ । सरकारको धरपकडमा परेका उद्योगी शेखर गोल्छाले १ करोड ५० लाख सहयोग उपलब्ध गराएका छन् ।
निर्माण व्यवसायीद्वय बिक्रम पाण्डेले १ करोड र रमेश शर्माले १ करोड ५० लाख सहयोग गरेका छन् । राज बहादुर शाहले ३ करोड, पशुपति मुरारका (अर्घाखाँची सिमेन्ट मार्फत)ले १ करोड ११ लाख, ऊर्जा क्षेत्रमा केन्द्रित बीजी ग्रुपले १ करोड २ लाख, साहस ऊर्जा (हिम पाठक)ले १ करोड ५१ लाख सहयोग गरेका छन् ।
२०८२ भदौमा भएको जेन् जी आन्दोलनमा ठूलो क्षति ब्यहोरेका व्यवसायी ध्रुब थापाले ७० लाख सहयोग गरेका छन् । अपी पावरले ३५ लाख सहयोग गरेको छ ।
चौधरी ग्रुपको चौधरी फाउण्डेशन र नबिल बैंकले संयुक्त रुपमा १५ करोडको प्याकेज घोषणा गरेका छन् भने आईएमई ग्रुपले १० करोड सहयोग गरेको छ ।
गोल्यान ग्रुप फिल्डमै पुगेर भदौ ११ गतेदेखि नै दैनिक ३ सय जना प्रभावितहरुलाई भोजन गराइरहेको छ भने यो ग्रुप अन्तर्गतको रिलायन्स स्पिनिङ मिल्सले १ करोड रुपैयाँ सहयोग पनि गरेको छ ।
विभिन्न कर्पोरेट ग्रुपहरु, बैंक तथा वित्तीय संस्था, बीमा कम्पनी, व्यवसायिक संघ संस्था र जनस्तरबाट सरकारलाई सहयोग गर्ने क्रम बढिरहेको छ । विदेशी दाताहरुबाट प्राप्त सहयोगबाहेक नेपालबाट मात्रै करिब ५ अर्ब हाराहारी सहयोग संकलन भइसकेको छ ।
