हाइड्रोइलेक्ट्रीसीटी इन्भेष्टमेन्ट एण्ड डेभलपमेन्ट कम्पनी (एचआइडीसीएल)ले हकप्रदमा अवितरित १ करोड ६८ लाख कित्ता बढी संस्थापक शेयरको लिलाम बिक्री आजदेखि खुला गरेको छ । कम्पनीले हकप्रदमा अवितरित संस्थापक समूहको १ करोड ६८ लाख ५९ हजार ५० कित्ता शेयर लिलाम बिक्री खुला गरेको हो ।
कम्पनीले लिलाम बिक्री खुला गरेको यी शेयर खरिद गर्न साउन २९ देखि भदौ ६ गतेसम्म आवेदन दिन सकिनेछ । कम्पनीले यी शेयरको मूल्य न्युनतम १०० रुपैयाँ तोकेकोले सो वा सो भन्दा बढी मूल्य कबोल गरि आवेदन दिनु पर्नेछ । आवेदन दिँदा न्युनतम १०० कित्ता र अधिकतम सबै कित्ताको लागि आवेदन दिन सकिनेछ । ५ लाख भन्दा बढीको आवेदन दिँदा प्यान नम्बर अनिवार्य आवश्यक छ ।
शेयर लिलामको लागि ग्लोबल आईएमइ क्यापिटल बिक्री प्रबन्धक रहेको छ । काठमाडौँमा क्यापिटलको कार्यालय नक्साल र ग्लोबल आईएमई बैंकको शंखमुल शाखाबाट आवेदन दिन सकिनेछ । काठमाडौँ बाहिर भने आवेदन दिनको लागि ग्लोबल आईएमई बैंकको १४ शाखा तोकिएका छन् ।
लिलाम प्रक्रियाबाट प्राप्त यी शेयर नेपाल स्टक एक्सचेन्ज नेप्सेमा HIDCLP सिम्बलबाट सजिल्यै कारोबार हुन सक्नेछन् । कम्पनीले यस अघि पटक पटक हकप्रदमा अवितरित संस्थापक शेयर लिलाममा ल्याए पनि पुरा बिक्री हुन सकेको थिएन । अब भने नेप्सेमा शेयर मूल्य बढेपछि फेरी संस्थापक शेयर लिलाममा ल्याएको हो । यो समाचार तयार पार्दासम्म नेप्सेमा यो कम्पनीको शेयर मूल्य १४९ रुपैयाँ २० पैसा रहेको छ ।
