आईजीआई प्रुडेन्सियल इन्स्योरेन्सले दुर्घटना तथा औषधी उपचार बीमा बापतको दाबी भूक्तानी गरेको छ । रामेछापको निशान बचत तथा ऋण सहकारी संस्थाका बचत सदस्य लक्ष्मण श्रेष्ठको केही महिना अघि पिकनिक खान जादा खाना सर्केर उपचारका क्रममा मृत्यु भएपछि उनको बीमा बापतको रकम कम्पनीले आज हस्तान्तरण गरेको हो ।
कम्पनीको तर्फबाट मन्थली शाखा प्रमुख बिपिन भट्टराईले दाबी भूक्तानी बापतको १ लाख रुपैयाँ बराबरको चेक रामेछाप नगरपालिकाका प्रवक्ता समिर कार्कीको रोहबरमा निशान साकोसका अध्यक्ष सुमन कुमार श्रेष्ठ र सचिव अपना श्रेष्ठलाई हस्तान्तरण गरेका हुन् ।
रामेछाप नगरपालिका वडा नम्बर ८ को निशान बचत तथा ऋण सहकारी संस्थाले आफ्ना सम्पूर्ण बचत सदस्यको दुर्घटना र औषधी उपचार बीमा आईजीआई प्रुडेन्सियल इन्स्योरेन्समा गरेको छ ।
आईजीआई प्रुडेन्सियल इन्स्योरेन्स मन्थली शाखाले बिगत ७ वर्षदेखि रामेछाप जिल्ला र आसपासको जिल्लामा निर्जीवन बीमा सेवा उपलब्ध गराउँदै आएको छ ।
