विश्वप्रसिद्ध चेन होटल ब्राण्ड मेरियटको लक्जरी ब्राण्ड ‘लक्जरी कलेक्शन बाई मेरियट’लाई नेपाल भित्र्याउँदै गरेका चर्चित व्यवसायी शेष घलेले होटलको लागत बढेको बताएका छन् । मेरियटका अध्यक्ष डेबटि मेरियटलाई निर्माणाधिन होटलको अवलोकन गराउने क्रममा घलेले अबको ३ देखि ४ महिनामा होटलको निर्माण सम्पन्न हुने र त्यतिबेलासम्म लागत १५ अर्ब पुग्ने/नाघ्ने देखिएको बताएका हुन् ।
उनका अनुसार अबको ६ महिनामा बाई मेरियट होटल सञ्चालनमा आउनेछ । यो होटल दक्षिण एशियामै मेरियटको पहिलो लक्जरी कलेक्शन ब्राण्ड हुनेछ । यसका लागि केही महिना अगाडि मात्रै घलेले मेरियटसँग सम्झौता गरेका थिए ।
यो होटलको निर्माण २०७१ सालबाट सुरु भएको हो । तर, भूकम्प, नाकाबन्दी, कोभिड लगायतका कारण निर्माण धकेलिँदै आएको छ । त्यतिबेला सन् २०१७ को अन्त्यसम्ममा होटलको निर्माण कार्य सम्पन्न गरी सन् २०१८ फेब्रुअरी महिनाबाट सञ्चालनमा ल्याउने लक्ष्या लिइएको थियो । सुरुमा सेराटन ब्राण्ड ल्याउने गरी ८ अर्ब रुपैयाँ लगानी अनुमानसहित निर्माण सुरु गरिएपनि निर्माण अवधि लम्बिँदा लागत पनि अनुमानको तुलनामा दोब्बरले बढ्ने देखिएको छ ।
निर्माणाधिन होटलको अवलोकन गर्दै मेरियटका अध्यक्ष डेबिट मेरियटले नेपालमा दक्षिण एशियाकै पहिलो लक्जरी कलेक्शन ब्राण्ड सुरु हुन लागेको भन्दै यसले नेपालको टुरिजमलाई अन्तर्राष्ट्रिय स्तरमा थप परिचित गराउने विश्वास लिएका छन् ।
