अन्तर्राष्ट्रिय पर्यटन मेला ‘पाँचौँ हिमालयन ट्राभल मार्ट’ जेठ २० देखि २२ गतेसम्म काठमाडौंमा आयोजना हुने भएको छ।
नेपालको पर्यटन प्रवर्द्धन गर्ने उद्देश्यले प्यासिफिक एसिया ट्राभल एसोसिएसन (पाटा) नेपाल च्याप्टर र नेपाल पर्यटन बोर्डले हिमालयन ट्राभल मार्ट आयोजना गर्न लागेका हुन् । पाटा नेपाल च्याप्टरका सीईओ सुरेशसिंह बुडालका अनुसार मेलामा पर्यटन सम्वद्ध प्रमुख संघ संस्था र राष्ट्रिय तथा अन्तर्राष्ट्रियस्तरका साझेदारहरुबीच सहकार्य हुनेछ ।
नेपालको पर्यटन प्रवर्द्धनमा टेवा पुर्याउने उद्देश्यले पर्यटन मेला आयोजना गर्न लागिएको हो । मार्टमा एक सयभन्दा बढी विदेशी पाहुनासहित नेपालका सार्वजनिक तथा निजी क्षेत्रमा आवद्ध पर्यटन व्यवसायी तथा सरोकारवालासहित ७ सयभन्दा बढी प्रतिनिधि सहभागी हुँदैछन् ।
सन् २०१७ देखि प्रत्येक वर्ष जुन महिनामा आयोजना हुँदै आएको हिमालयन ट्राभल मार्ट नेपालको प्रमुख अन्तर्राष्ट्रिय पर्यटन व्यापार मेला हो ।
