नेपालमा भारतीय लगानीलाई थप सुदृढ बनाउने तथा द्विपक्षीय आर्थिक सहकार्य अभिवृद्धि गर्ने अवसरहरूबारे छलफल गर्न नेपाल–भारत उद्योग वाणिज्य संघ (निक्की) ले लगानी बोर्ड नेपालसँग छलफल गरेको छ । उक्त बैठकमा नेपालका प्रधानमन्त्रीको आगामी भारत भ्रमणको सन्दर्भमा प्रस्तावित नेपाल–भारत प्रमुख कार्यकारी अधिकृत (सीईओ) गोलमेच बैठक आयोजना गर्ने विषयलगायतका मुद्दामा छलफल गरिएको थियो।
बैठकमा निक्कीका अध्यक्ष कुनाल कायल, निवर्तमान अध्यक्ष सुनील के.सी., उपाध्यक्ष गौरव टायल, स्थायी आमन्त्रित सदस्य साइबल घोष, लगानी बोर्ड नेपालकी प्रमुख कार्यकारी अधिकृत याङ्की उक्याब, निक्कीका निर्देशक मार्सल राठौर तथा कार्यक्रम सहयोगी श्रेयसी राणा सहभागी थिए ।
त्यसैगरी, लगानी बोर्ड नेपालका तर्फबाट सहसचिव भूपेन्द्र थापा तथा वरिष्ठ डिभिजनल इन्जिनियर दीपक मुढभरीलगायतका प्रतिनिधिहरूको उपस्थिति रहेको थियो।
छलफलमा सार्वजनिक तथा निजी क्षेत्रबीचको सहकार्यलाई सुदृढ बनाउने, नेपालमा सफलतापूर्वक सञ्चालन भइरहेका भारतीय लगानीका उदाहरणहरूलाई उजागर गर्ने तथा व्यवसायदेखि व्यवसाय (बीटुबी) तहसम्म थप लक्षित अन्तरक्रियामार्फत नयाँ लगानी आकर्षित गर्ने अवसरहरूको पहिचान गर्ने विषयमा विशेष जोड दिइयो ।
निक्कीका अध्यक्ष कुनाल कायलले भारतीय व्यावसायिक संस्थाहरूसँग संघको व्यापक सञ्जाल र भारतमा रहेको स्थापित उपस्थितिबारे प्रकाश पारे । उनले नेपालको लगानी सम्भावनालाई अझ प्रभावकारी ढङ्गले प्रचारप्रसार गर्न तथा नेपालमा कार्यरत स्थापित भारतीय उद्यमहरूले पुर्याउँदै आएका योगदानलाई उजागर गर्नुपर्ने महत्त्वमा जोड दिए ।
लगानी बोर्ड नेपालकी प्रमुख कार्यकारी अधिकृत याङ्की उक्याबले निक्कीको सक्रिय सहभागिताको स्वागत गर्दै लगानी सहजीकरणलाई सुदृढ बनाउने, सम्बन्धित सरोकारवालाबीच समन्वय सुधार गर्ने तथा लगानी प्रवर्द्धनका लागि थप व्यवस्थित दृष्टिकोण विकास गर्ने महत्त्वबारे चर्चा गरिन् । उनले लगानीका अवसरहरूलाई अगाडि बढाउन रचनात्मक निजी क्षेत्रको सहभागिता तथा पूर्वतयारी गरिएका ठोस प्रस्तावहरूको महत्त्वमा जोड दिइन् ।
बैठकमा ज्ञान तथा अनुभव आदानप्रदान र नेपालको लगानी सहजीकरणसम्बन्धी संस्थाहरू तथा भारतीय व्यावसायिक सञ्जालबीच थप सुदृढ सम्बन्ध स्थापना गर्नेलगायतका विषय समेटेर संस्थागत सहकार्यलाई अझ नजिक बनाउने सम्भावनाबारे पनि छलफल भएको निक्कीले जनाएको छ ।
