अर्थमन्त्री डा. स्वर्णिम वाग्लेले सरकारले मध्यम वर्गको विस्तार गर्ने लक्ष्य लिएको छ । राज्य सबैको अभिभावक हो भन्दै उनले लोकतन्त्र जोगाउन र विकासका परम्परागत मानकलाई न्याय गर्न पनि मध्यम वर्गको विस्तार आवश्यक रहेको बताएका छन् ।
उनले निजी, सामुदायिक र सार्वजनिक अवसरहरुलाई समान वितरणमार्फत सामाजिक बजार अर्थतन्त्रको विकास गरिने पनि बताएका छन् । राज्य बलियो हुनुपर्छ भन्ने मान्यता आफ्नो पार्टी रास्वपाले पनि अङ्गिकार गरेको बताउँदै अर्थमन्त्री डा. वाग्लेले तर, निजी क्षेत्रलाई दौडिन नदिई आर्थिक लक्ष्यहरु हासिल नहुने पनि स्पष्ट पारेका छन् ।
‘राज्य बलियो हुनुपर्छ । तर १० मध्ये ८ नयाँ रोजगारी निजी क्षेत्रबाट सिर्जना हुन्छ । निजी क्षेत्रलाई बत्तिएर अगाडि जान दिने हो’ उनले भने, ‘यसका लागि नीतिगत, संरचनागत र कानूनी सहजीकरण गर्नुपर्छ ।’
उनले निजी क्षेत्रलाई उत्साहित नबनाईए र राज्यले बलियो साथ नदिए राज्यले लिएका लक्ष्यहरु पूरा नहुने बताउँदै उद्यममैत्री, लगानी अनुकुल र प्रतिस्पर्धात्मक सामाजिक बजार अर्थतन्त्र रास्वपाको आर्थिक नीति भएको बताएका छन् ।
