भदौ २३ र २४ गतेको ‘जेन–जी’ आन्दोलन पश्चात अन्तरिम सरकार गठन भएयता ‘स्वघोषित जेन जी अगुवा’को अराजकता बढ्दै गएको छ । सरकार र मन्त्रिपरिषद गठनमा ति अगुवाहरुको हस्तक्षेपले अझै पनि मन्त्रिमण्डलले पूर्णता पाउन सकेको छैन । प्रधानमन्त्री सुशिला कार्कीलाई नै सुदन गुरुङहरुले हत्तुहैरान बनाएका छन् ।
आन्दोलन पश्चात एकाएक विभिन्न नाममा जेन–जीका समूह नै खडा भएका छन् । अहिलेसम्म देखिएका दर्जनभन्दा बढी यी समूहहरुले सार्वजनिक निकायको हुर्मत मात्रै लिएका छैनन्, लगानी नै बिथोलिने खालका गतिविधि समेत बढाएका छन् ।
भोटेकोशीमा निःशुल्क सेयर
जेनजी समूहका नाममा एउटा समूहले सिन्धुपाल्चोकस्थित ४५ मेगावाटको अपर भोटेकोशी जलविद्युत् आयोजना एक महिना बन्द गराए । उनीहरुले निःशुल्क १० प्रतिशत सेयर आफूहरुलाई दिनुपर्ने माग राखेका थिए । ‘भोटेकोशी गाउँपालिका जेनजी ग्रुप’ का नामको समूहले निःशुल्क १० प्रतिशत सेयर दिनुपर्ने माग गर्दै आयोजना नै बन्द गराउँदा आयोजनाले करिब ३० करोड रुपैयाँ क्षति ब्यहोर्नुप¥यो ।
अन्ततः उक्त समूहले अहिले नगद लगानी नगर्ने तर, भविष्यमा आउने नाफाबाट कटाउने गरी भोटेकोशी जलविद्युत आयोजनाको १० प्रतिशत शेयर हत्यायो । निरन्तर अवरोध भएपछि भोटेकोशी पावर कम्पनी सेयर दिन बाध्य भयो । ‘भोटेकोशी जेन–जी पब्लिक इन्भेष्टमेन्ट पब्लिक लिमिटेड’ नामक कम्पनीमा सबै स्थानीय साझेदार रहने र उक्त कम्पनीलाई आयोजनाले १० प्रतिशत सेयर उपलब्ध गराउने सम्झौता भएको हो ।
‘धम्क्याएरै सेयर लिए’ एक जना जलविद्युत विकासकर्ता भन्छन्, ‘लगानी गर्नुनपर्ने, धम्क्याएकै भरमा सेयर पाइने भएपछि कसरी काम गर्न सकिन्छ ?’
क्यानमा छिरेर महानिर्देशकको हुमर्त
विगतमा प्रहरीमा उजुरी परेका र पक्राउ पूर्जीसमेत जारी भइसकेका व्यक्ति पनि अहिले रातारात जेन जी अगुवामा रुपमा पदार्पण भएका छन् । यीमध्ये एक हुन् अछामका अर्जुन शाही ठकुरी । उनीविरुद्ध बैंकिङ कसुर र वैदेशिक रोजगार सम्बन्धि ठगीको उजुरी थियो । उनलाई बैशाख २८ गते काठमाडौं उपत्यका अपराध अनुसन्धान कार्यालयले पक्राउ गरेको थियो ।
प्रहरी वृत्त महाराजगञ्जले पनि उनीविरुद्ध दुई वटा उजुरीमा मुद्दा चलाएको देखिन्छ । जेनजी आन्दोलन हुनुभन्दा केही दिन अघि मात्रै हिरासतमुक्त भएका उनी अहिले रातारात जेनजी अगुवाका रुपमा देखिएका छन् । उनकै नेतृत्वको एउटा समूहले नेपाल नागरिक उड्डयन प्राधिकरण (क्यान)का महानिर्देशक प्रदीप अधिकारीलाई कार्यालयमै छिरेर गालिगलौज गरेको छ । असक्षम, कार्य क्षमता नभएको, अराजक लगायतका आरोप लगाउँदै शाहीको समूहले निर्देशनको शैलीमा महानिर्देशक अधिकारीको राजीनामा मागेको छ । अराजक शैलीमा आफूविरुद्द आफ्नै कार्यालयमा आएर हुर्मत लिँदा पनि महानिर्देशक अधिकारी भने निरिह देखिन बाध्य भए ।
नेपाल एयरलाइन्सदेखि अख्तियारमा समेत अस्वभाविक हस्तक्षेपको प्रयाश
शाहीकै समूह सोमबार नेपाल एयरलाइन्सको कार्यालयभित्र छिरेर अनुसन्धानको शैलीमा सोधीखोजी गर्न थाल्यो । नेपाल एयरलाइन्सका कार्यकारी अध्यक्ष युवराज अधिकारी कार्यालयमा थिएनन् । त्यसपछि उनीहरुले कर्मचारीलाई हप्कीदप्की गरे ।
कार्यालय प्रमुख नदेखेपछि शाही आफैँले कर्मचारीलाई आदेश दिँदै भने, ‘तपाइहरुको हाकिम कहाँ हुनुहुन्छ ? तुरुन्त यहाँ ल्याउनुस् । नत्र घरबाटै थुतेर ल्याउँछौँ ।’
त्यसपछि सोमबारै शाहीको समूह अख्तियार दुरुपयोग अनुसन्धान आयोगमा पनि पुग्यो । उनीहरुले अख्तियारका प्रमुख आयुक्त प्रेम राईसँग भेट्न खोजे । तर, प्रमुख आयुक्त राईले शाहीको समूहलाई भेट दिएनन् । त्यसपछि अराजक शैलीमा उनीहरुले गालीगलौज गर्न थाले । आयुक्तहरु र कर्मचारीहरुलाई थर्काए, धम्क्याए ।
जसका कारण अहिले सार्वजनिक निकायदेखि उद्योगी व्यवसायीमा समेत असुरक्षाको त्रास बढेको छ । उद्योगीहरुले त निर्वाध रुपमा उद्यम व्यवसाय सञ्चालनका लागि सुरक्षाको वातावरण बनाउन सरकारसँग अनुरोध नै गर्दै आएका छन् ।
