आफ्नो उद्यमको लागि थप लगानी जुटाउने उदेश्यले वा आफ्नो उद्यमको विज्ञापन गर्ने उदेश्यले उद्यमीहरु शार्क ट्यांकमा जाने गर्छन्। जहाँ उद्यमीहरु हजार, लाख वा करोडमा लगानीको लागि आग्रह गर्छन् ।
तर बुधबार प्रसारण भएको शार्क ट्यांक नेपालको पहिलो सिजनको सातौँ एपिसोडमा भने एउटा फरक दृष्य देखियो । जहाँ एउटा व्यवसायले १ हजार रुपैयाँको लागि मात्र लगानी गर्न आग्रह गर्यो र पाँच जना शार्कले नै त्यसलाई स्वीकार गरेर प्रति शार्क २ सय रुपैयाँको चेक काटेर लगानी गरे। अर्थात् उनीहरुले २ सय रुपैयाँ लगानी गरे।
यसरी लगानी पाउने व्यवसायको बिहे नेपाल, जुन सन् २०२२ देखि सुरु भएको हो । यसले मोबाइल एप मार्फत वर र बधुलाई विवाहको लागि जोडी मिलाईदिने काम गर्छ। अर्थात् यो म्याच मेकिंग एप हो। यो व्यवसाय श्रेया कटुवाल र श्रद्धा कटुवालले सुरु गरेका हुन् । उनीहरु दिदीबहिनी हुन् । उनीहरुका अनुसार हालसम्म बिहे नेपालको एप १ लाख ५५ हजार पटक डाउनलोड भईसकेको छ। र यसले विश्वका जुनसुकै कुनामा रहेका नेपालीलाई पनि जोडी मिलाइने काम गर्छ । साथै एपमा जोडी फिक्स नभएसम्म अनुहार लुकाउन सकिने युजर प्राइभेसीको सुविधा, ब्लाइन्ड डेटमा जान सकिने सुविधा र कुण्डली म्याचिङको सुविधा पनि रहेको छ।
यो आइडिया आफ्नो आमाको रहेको र दुई महिना अगाडी आमाको निधन भएता पनि आमाको सपनालाई आफुहरुले अगाडी बढाईरहेको ति दिदीबहिनीहरुको भनाई थियो । उनीहरुको कम्पनीको भ्यालुएसन १ लाख रुपैयाँको गरेर १ प्रतिशतको शेयरको लागि १ हजार रुपैयाँ मात्र लगानीको लागि माग गरेका थिए। सिम्बोलिक रुपमा मात्र लगानी चाहिएको भन्दै १ हजार रकम माग गरिएको उनीहरुको भनाई थियो। साथै १ प्रतिशतभन्दा बढी शेयर पनि नदिने उनीहरुको भनाई थियो।
उनीहरुको प्रस्तावमा सबै शार्कले सहमति जनाउदै कुल १ हजार लगानी गरेका हुन् । जुन प्रति शार्क २ सय रुपैयाँ मात्र हो । सबै शार्कले २ सयको चेक उनीहरुलाई प्रदान गरेका थिए।
