युनिभर्सल पावर कम्पनी लिमिटेडले चालु आर्थिक वर्ष २०८१/८२ को पहिलो त्रैमासको वित्तीय विवरण प्रकाशन गरेको छ। प्रकाशित वित्तीय विवरण अनुसार यस अवधिको कम्पनीको खुद नाफा ३०.४ प्रतिशतले बढेको छ।
यस अवधिमा कम्पनीले ७ करोड ४८ लाख १९ हजार खुद नाफा कमाएको छ। अघिल्लो आर्थिक वर्षको यसै अवधिमा कम्पनीको खुद नाफा ५ करोड ७३ लाख ६६ हजार थियो।
यस अवधिमा कम्पनीको कुल आम्दानी १२ करोड १ लाखबाट बढेर १२ करोड ५० लाख पुगेको छ। कम्पनीको ब्याज खर्ज भने ४ करोड १४ लाखबाट घटेर २ करोड ६४ लाख कायम भएको छ । ब्याज खर्च घटेको कारण कम्पनीको आम्दानी खासै नबढेपनि नाफा भने ३० प्रतिशतले बढेको देखिन्छ ।
यस अवधिमा कम्पनीको वार्षिकीकरण गरिएको प्रति शेयर आम्दानी १३.१३ रुपैयाँ रहेको छ भने प्रति शेयर नेटवर्थ १०९.७१ रुपैयाँ रहेको छ। २ अर्ब २७ करोड चुक्ता पुँजी रहेको कम्पनीको रिजर्भमा २२ करोड १३ लाख रुपैयाँ रहेको छ।
कम्पनीले दोलखा जिल्लाको गौरीशंकर गाँउपालिकाको वडा नं. ६ मा ११ मेगावाट क्षमताको तल्लो खारे खोला जलविद्युत आयोजनाबाट विद्युत उत्पादन गर्दै आई रहेको छ । कम्पनीबाट लगानी गरिएको राप्ती हाइड्रो एण्ड जनरल कन्सट्रक्सन लिमिटेड द्वारा प्रर्वधित (रुकुम गाढ जलविद्युत आयोजना-५ (मेगावाट) आयोजनाको निर्माण सम्पन्न गरी विद्युतको व्यापारीक उत्पादन शुरु भईसकेको छ। कम्पनीबाट लगानी गरिएको माथिल्लो इङ्खु खोला जलविद्युत आयोजना (२४.२२ मे.वा) को नेपाल विद्युत प्राधिकरणसँग विद्युत खरिद बिक्री सम्झौता प्रकृयामा रहेको छ र साथै विद्युत विकास विभागसँग विधुत उत्पादन अनुमति पत्रको प्रकृयामा रहेको कम्पनीले जनाएको छ ।
