जलविद्युत उत्पादकहरुको संस्था स्वतन्त्र ऊर्जा उत्पादकहरुको संस्था नेपाल (इप्पान)को साधारणसभा र चुनावको मिति तय भएको छ । शुक्रबार बसेको बैठकले जेठ २९ गते साधारणभाको मिति तय गरेको हो ।
यसपाली हुने इप्पानको साधारणसभा चुनाव सहितको हुने भएकाले उक्त साधारणसभाले आगामी ३ वर्षका लागि नयाँ कार्यसमिति चयन गर्नेछ । हालका वरिष्ठ उपाध्यक्ष मोहन डाँगी स्वतः अध्यक्ष बन्दैछन् । हालका अध्यक्ष गणेश कार्की कार्यकाल सकेर बिदा हुनेछन् ।
अन्य पदका आकांक्षीहरु खुल्न थालिसकेका छन् । वरिष्ठ उपाध्यक्ष, ५ जना उपाध्यक्ष, महासचिव, उपमहासचिव, ५ जना सचिव र एक जना कोषाध्यक्ष पदाधिकारी रहने इप्पानको प्रावधान छ । पदाधिकारीबाहेक १० जना सदस्य पनि हुनेछन् । यी पदका आकांक्षीहरु अहिले भेटघाट र टिम निर्माणमा सक्रिय छन् ।
अकांक्षीहरु धेरै हुने भएकाले सर्वसम्मतिको सम्भावना कम रहेको बताइन्छ । केही दिनमै साधारणसभा र निर्वाचन बारेको सूचना आउने भएकाले त्यसपछि माहोल अझै चर्किने विश्लेषण हुन थालेको छ ।
