विद्युत विकास विभागले नेशनल हाइड्रोपावर कम्पनी लिमिटेडको १ करोड बढी रकम जफत गर्ने तयारी गरेको छ। विभागले कम्पनीसँग डेभलपमेन्ट सेक्युरिटी वापतको बैंक ग्यारेण्टी राखिएको रकम जफत गर्ने तयारी गरेको हो ।
विभागले बैंक ग्यारेण्टी वापतको १ करोड ६ लाख ४८ हजार ४ सय २८ रुपैयाँ जफत नगर्नु पर्ने कुनै कारण भए ७ दिन भित्र विभाग समक्ष स्पष्टीकरण पेश गर्न कम्पनीलाई चैत्र १० गते पत्र पठाएको थियो । स्पष्टीकरण चित्तो बुझ्दो नभए विभागले सो रकम जफत गर्ने छ ।
कम्पनीले तल्लो ईन्द्रावती जलविद्युत आयोजना समय मै निर्माण सम्पन्न गर्न नसकेपछि विभागले रकम जफत गर्ने प्रक्रिया अघि बढाएको हो । विभागका अनुसार कम्पनीले पाएको तल्लो ईन्द्रावती जलविद्युत आयोजनाको विद्युत उत्पादनको अनुमतिपत्र (वि.वि.वि.०७९/८०, वि. उ. ४०१ ) को शर्त (ङ- ३) मा आयोजनाको व्यापारिक उत्पादन शुरु गर्नु पर्ने मिति (RCOD) पछिल्लो पटक थपिएको म्याद सहित २०८२ कार्तिक २८ थियो। अर्थात् कम्पनीले गत कार्तिक २८ गते भित्र आयोजनाबाट विद्युत उत्पादन गरिसक्नु पर्ने थियो।
तर सो समय भित्र आयोजनाको व्यापारिक उत्पादन (COD) नभएको हुँदा विभागको नाममा बैंकबाट जारी भएको Development Security बापतको Bank Guarantee रकम विभागले जफत गर्न लागेको हो।
