नेपाल विद्युत प्राधिकरणले यसवर्ष तिहारको लक्ष्मी पूजा सकिए लगत्तै उद्योगमा बिजुलीको लाइन काट्न थालेको छ । सोमबार लक्ष्मी पूजा मनाउन दिएर मंगलबार बिहानैबाट प्राधिकरणले उद्योगको लाइन काट्न थालेको हो ।
डेडिकेटेड÷ट्रंक लाइनको विवादित विद्युत महशुल तिर्नका लागि कार्तिक २ गते सम्मको समय दिएको प्राधिकरणले बक्यौता तिर्न नआएका उद्योगहरुको लाइन काट्न थालिएको जनाएको छ । जस अनुसार हालसम्म ६ वटा उद्योगको लाइन काटिएको छ ।
प्राधिकरणका अनुसार घोराही सिमेन्ट, अर्घाखाँची सिमेन्ट, जगदम्बा स्टील र त्रिवेणी स्पिनिङ, रिलायन्स स्पिनिङ मिल्स र शिवम सिमेन्टको बिजुलीको लाइन काटिएको छ । बढी बक्यौता बाँकी रहेका उद्योगहरुको लाइन काट्नै जाने नीति अनुसार अरु उद्योगको पनि लाइन क्रमशः काटिने प्राधिकरणले जनाएको छ ।
उद्योगीहरुले प्राधिकरणले विद्युत खपत गरेको प्रमाण स्वरुप टीओडी मिटरको डाटा दिएमा आफूहरु महशुल तिर्न तयार रहेको जनाएका छन् । तर, प्राधिकरणले प्रमाण भने दिन सकेको छैन । प्राधिकरणले प्रमाण नदिएका कारण उद्योगीहरु प्राधिकरणले भने अनुसारको महशुल तिर्न तयार देखिएका छैनन् ।
