भैरहवास्थित गौतमबुद्ध अन्तराष्ट्रिय विमानस्थलबाट कुवेतको जजीरा एयरले पुनः उडान गर्ने भएको छ । यसअघि २ पटक भैरहवा–कुवेत उडान गरेर पनि नियमित गर्न नसकेको जजीरा एयरले पुनः भदौ तेस्रोबाट उडान गर्ने तयारी थालेको हो ।
साउन २९ गते नेपाल नागरिक उड्डयन प्राधिकरणलाई पत्राचार गर्दै जजीराले भैरहवा–कुवेत–भैरहवा रुटमा उडान तालिका स्वीकृतिका लागि अनुरोध गरेको हो ।
जजीराले सोमबार, बुधबार, बिहीबार र शनिबार गरी हप्तामा ४ उडान गर्ने तालिका स्वीकृत गर्न पत्राचार गरेको हो । नेपाल नागरिक उड्डयन प्राधिकारणका अनुसार जजीराले केही दिनमै उडान अनुमति पाउने छ ।
सरकारले भैरहवाबाट उडान गर्ने एयरलाइन्स कम्पनीहरुलाई सहुलियत दिने निर्णय गरेको छ । सरकारले भैरहवा र पोखरा एयरपोर्ट सञ्चालन कार्ययोजना स्वीकृत गरिसकेको छ । यस आधारमा भैरहवा–कुवेत उडानमा यात्रुलाई टिकट मूल्यमा काठमाडौँ–कुवेतको तुलनामा १० हजार सस्तो पर्ने बताइएको छ ।
सरकारले दिने भनेको छुटको यकिन विवरण क्यानमा आएपछि क्यानले जजीरालाई भैरहवा–कुवेत उडानको अनुमति दिनेछ ।
