१५ दिनमा दुई दुर्घटना भएपछि नेपाल नागरिक उड्डयन प्राधिकरण (क्यान)ले केही एयरलाइन्स कम्पनीलाई उडानमा प्रतिबन्ध लगाएको छ । क्यानले सुरक्षा व्यवस्थापन प्रणाली परिपालना नगरको भन्दै सौर्य एयरलाइन्ससहित मुस्ताङ र अन्नपूर्ण हेलिकप्टरलाई उडानमा रोक लगाएको हो ।
प्राधिकरणले मुस्ताङ र अन्नपूर्ण हेलिकप्टर कम्पनीको उडान सञ्चालन प्रमाणपत्र (एओसी) समेत निलम्बन गरेको छ । अन्नपूर्णसँग एउटा हेलिकप्टर छ भने मुस्ताङसँग दुईवटा हेलिकप्टर छन् । मुस्ताङ एक वर्षदेखि ग्राउण्डेड छ ।
प्राधिकरणले सौर्य एयरलाइन्सको एओसी पनि निलम्बन गरेको छ । काठमाडौँबाट ‘सीचेक’का लागि पोखरा लैजाँदै गर्दा सौर्यको जहाज काठमाडौँ विमानस्थलभित्रै दुर्घटनाग्रस्त हुँदा १८ जनाले ज्यान गुमाएका थिए ।
