निजी क्षेत्रको हवाई सेवा प्रदायक बुद्ध एयरले खाडी क्षेत्रमा जारी द्वन्द्वका कारण जहाज उडाउनु चुनौतीपूर्ण बनेको बताएको छ । खाडी क्षेत्रमा जारी द्वन्द्वका कारण उच्च इन्धन लागतका कारण पर्यटन तथा हवाई सेवा क्षेत्रलाई चुनौती थपिएको बुद्ध एयरको भनाइ छ ।
कम्पनीले बिहिबार एक विज्ञप्ति जारी गरेर खाडी क्षेत्रमा जारी द्वन्द्वका कारण नेपालको पर्यटकीय सिजनमा प्रत्यक्ष प्रभाव बताउँदै विदेशी पर्यटकहरूले पूर्व बुकिङ गरेका हवाई टिकटहरू समेत धमाधम रद्द गरिरहेको जनाएको हो ।
बुद्ध एयरले हालै हवाई इन्धन शुल्कमा भएको वृद्धि अप्रत्याशित मात्र नभई अहिलेसम्मकै उच्च रहेको पनि जनाएको छ । स्वचालित रूपमा भएको इन्धन मूल्य वृद्धिको प्रत्यक्ष प्रभाव हवाई भाडादरमा परेको विज्ञप्तिमा उल्लेख छ । साथै, वर्तमान अवस्थामा गरिएको भाडा समायोजन प्रचलित नियमअनुसारकै भएको कम्पनीले स्पष्ट पारेको छ ।
बुद्ध एयरका कार्यकारी अध्यक्ष वीरेन्द्र बहादुर बस्नेतले यस्तो प्रतिकूल परिस्थितिमा पनि अत्यन्त संयमता अपनाउँदै न्यूनतम स्तरमै भाडादर वृद्धि गर्नुबाहेक अन्य विकल्प नरहेको बताएका छन् । उनका अनुसार हवाई सेवाको कुल सञ्चालन लागतको करिब ४० प्रतिशत हिस्सा इन्धनमै खर्च हुने गर्दछ, तर हालको मूल्यवृद्धि पछि यो अनुपात झण्डै ५० प्रतिशत हाराहारीमा पुगेको छ ।
यससँगै अमेरिकी डलरको मूल्यवृद्धिका कारण जहाजका पार्टपुर्जा, मर्मतसम्भार, प्राविधिक जनशक्तिको तालिम तथा अन्य आवश्यक खर्चहरू समेत उल्लेखनीय रूपमा बढेको कम्पनीले जनाएको छ ।
हालको परिस्थितिमा इन्धनको मूल्य सामान्य हुन समय कुर्नु बाहेक अन्य विकल्प नरहेको कम्पनीले जनाउँदै कम्पनीले स्थिति सामान्य बन्दै जाँदा पर्यटन क्षेत्र पुनः सशक्त रूपमा उभिने विश्वास व्यक्त गरेको छ ।
