इजरायल र इरानीबच चर्किएको युद्धका कारण नेपालबाट मध्यपूर्वका विभिन्न देश तथा शहरमा हुने हवाई उडान रद्द भएका छन् । नेपाल नागरिक उड्डययन प्राधिकरणका अनुसार त्रिभुवन अन्तर्राष्ट्रिय विमानस्थलबाट मार्च १ (फागुन १७) का तय भएका विभिन्न ५ एयरलाइन्स कम्पनीका १० उडान रद्द भएका छन् ।
प्राधिकरणका अनुसार जजीरा एयरवेजको कुवेतका लागि आज २ उडान थिए । यी दुइ उडान रद्द भएका छन् । जसबाट २५० जना यात्रु प्रभावित भएका छन् । यस्तै, एयर अरेबियाको शारजाहमा हुने तय भएका २ वटा उडान पनि रोकिएका छन् । जसबाट ३ सय यात्रु मर्कामा परेका छन् ।
एयर अरेबियाको आबुधाबी उडान पनि रोकिएको छ । उसका वटा २ उडान रद्द हुँदा २८० जना यात्रु प्रभावित भएको प्राधिकरणले जनाएको छ । यसैगरी, कतार एयरवेजको दोहाका लागि हुने २ वटा उडान पनि रोकिएको छ । जसका कारण ४५० जना समस्यामा परेका छन् ।
यसैगरी, फ्लाई दुबईका २ वटा उडान समेत रद्द हुँदा ३२० जना यात्रु रोकिएका छन् ।
