मंगलबार ‘नाडा अटो शो २०२५’ सुरु भयो । यसपटकको ‘अटो शो’को मुख्य आकर्षण बनेको छ दीपलको ‘उड्ने कार’ ईभीटोल (इलेक्ट्रोनिक भर्टिकल टेकअफ एन्ड ल्यान्डिङ) । नाडा अटोमोबाइल्स एसोसियशन अफ नेपालले अटो शोका विषयमा जानकारी दिन आयोजना गरेको पत्रकार सम्मेलनमा उड्ने कार ल्याउने उद्घोष गरेसँगै चुलिएको चर्चा मंगलबार भृकुटीमण्डपमा ‘भीड’मा परिणत भयो ।
अटो शो अवलोकनमा पुग्नेमध्ये सबैले उड्ने कार अवलोकन गरिरहेका छन् । धेरैजसोले फोटो र भिडियो पनि खिचिरहेका छन् ।
नाडा अटो शो उद्घाटन लगत्तै प्रधानमन्त्री केपी शर्मा ओलीले पनि उड्ने कारको अवलोकन गरे । प्रधानमन्त्रीले अवलोकन गर्दा पनि भीडलाई थेग्न स्वयम् सेवक र सुरक्षाकर्मीलाई हम्मेहम्मे परेको थियो ।
प्रधानमन्त्री अवलोकन गरे पश्चात सर्वसाधारणका लागि उड्ने कार हेर्न खुला गरिएको छ । जुन भदौ ८ गतेसम्म कायम रहने छ ।
चलाउन पाइँदैन, किनबेच पनि हुँदैन
अहिले उड्ने ट्याक्सी आएको विषय जति चर्चामा छ, यसको खरिद बिक्री कसरी होला र यसलाई चलाएर देखाइन्छ कि देखाइँदैन भन्ने विषय पनि त्यति नै चर्चामा छ । तर, नेपालमा उड्ने ट्याक्सी चलाउने कानुन नै नभएकाले यसपाली प्रदर्शनीमा राखिएको उड्ने ट्याक्सी केवल प्रदर्शनीमा मात्र राखिनेछ ।
साथै, यसको किनबेच पनि नहुने एमडब्ल्यू बृद्धिका निर्देशक बिवेक सिकारियाले बिजनेशपानालाई जानकारी दिए । उनका अनुसार अहिले यसलाई केवल प्रदर्शनीमा मात्रै राखिनेछ । अब भविष्यको मोबिलिटी यो हो भन्ने सन्देश दिनका लागि फ्लाइङ कार ल्याएर प्रदर्शनीमा राखिएको र यसले नीतिगत तहमा बहस र छलफलको सिर्जना गर्ने विश्वास लिइएको सिकारिया बताउँछन् ।
यद्यपी, कम्पनीका अनुसार यसको मूल्य करिब ८ करोडसम्म पर्न सक्ने देखिन्छ । नाडा अटो शो सकिएपछि यस उड्ने कार चांगान अटोलाई नै फिर्ता गरिने सिकारिया भनाइ छ ।
जमिनबाट अधिकतम् ३ हजार मिटर उचाइसम्म उड्न सक्ने यो ट्याक्सी एकपटकको फुच चार्जमा ३५ किलोमिटरसम्म उड्न सक्नेछ । यसको अधिकतम् गति प्रतिघण्टा १३० किलोमिटर छ । २ घण्टामा फुल चार्ज हुने यस उड्ने ट्याक्सी एकपटकमा २१ मिनेटसम्म उड्न सक्छ ।
